Ki MLA Congress, kim pat iakren ban iasoh NPP, ong U MR

Shillong: U Myntri rangbah ka jylla U Conrad K Sangma, u la ong ba halor ka rai jong ka AICC pyrshah ia ki san ngut ki MLA ka Congress ki ba la wan ban ai ka jingkyrshan ia ka sorkar Meghalaya Democratic Alliance (MDA) ka dei ka kampohing jong ki, hynrei u la pynshai ruh ba ka jingwan ai jingkyrshan jong ki ia ka sorkar ka long halor ki ba bun ki mat ha ka jylla.

Haba ia kren bad ki lad pathai khubor u Myntri rangbah ka jylla u la ong “Kane ka dei ka mat jong ka AICC bad ki MLA jong ka, ha kaba ka ei ka party ka la shim ia ka rai ngam kwah ban ong eiei halor kane ka bynta hynrei ka jingwan kyrshan jong ki san ngut ki MLA ka Congress ia ka sorkar hi ka long na ka bynta ka jingmyntoi jong ka jylla”.

Haba kylli u Myntri rangbah u la ong “Kam pat don kano kano ka jingiakren na ka liang ki MLA ka Congress ban pyniasoh noh sha ka NPP, hynrei ka jingwan hi ka long tang ban kyrshan na ka bynta ban ia trei lang halor ki mat ki ba la sahkut slem“. “Haba ka sorkar ka la shim ia ka sienjam ban ialeh ban pynbeit ia kine ki mat ki ba sahkut la slem, na ka liang ki MLA na ki wei ki party ki kwah ban kyrshan ia ngi bad kane ka wan rah ia ka khubor ba bha ia ka jylla ban pynpaw ia ka jingtrei lang jong ki nongmihkhmat na ka bynta u paidbah ha ka jylla”la ong u Sangma. Halor ka jingkynthoh jong ka liang pyrshah AITC u myntri rangbah u la ong “Lada ka sorkar ka la pynjynsor ia ki protocol ki kynthoh balei ki pyllait lut bad lada ka khang ki kynthoh balei ki khang, ki liang pyrshah ki dei ban pynbeit ia la ka jingmut jingpyrkhat kaei ba ki kwah”.

U Myntri rangbah u la ong “Teng teng ka long kaei kaei ka ba sngewsih ba ha man ka sien jam ba ka sorkar ka shim ki pyrshang ban wad ia ki jingeh bad ki kynthoh, ngam tharai ka synshar khadar kan iaid kumne, ki dei ban ai jingmut ia ka sorkar namar ban shu kynthoh katba mon kam dei”.

“Na ka liang ka sorkar ka peit bad ka phikir ia ka koit ka khiah ha ka jylla kum juh ruh kan hap ban pynthikna ruh ba kan ym don shuh kano kano ka jingktah ia ka ioh ka kot ha ka jylla”u la bynrap.

U Sangma u la ong “Ka liang pyrshah ka lah ban kynthoh kat ba ka kwah namar ba ka la long ka jingmlien jong ki ban kynthoh beit ia ka sinjam ka ba ka sorkar ka shim”.