Ki MDC mynta ba khlem khlieh khlem kam, tang ia ka pisa: CK Pasi

Shillong, 18 Rymphang:
“Bun na ki nongmih khmat (MDC) kim sngew thuh ia ka bor jong ka District Council bad kim sngewthuh ia ka 6th Scheduled bad ki iakhun elekshon khlem khlieh khlem kam tang namar ban kamai spah”, la ong u Rangbah shnong ka Rynjah u Bah CK Pasi.
U Bah Pasi haba iakre bad u Rupang hynne ka sngi u la ong ba ki nongmihkhmat ki kwah ialeh elekshon tang na ka bynta pisa ban ai kam ai jam ia kiba haiing hasem, ban kamai spah khlem don shisha ka thong bad ka jingmut ba shisha ban shakri ia ka jaitbynriew.
“Naduh u snem 1952 la wan ka district council hynrei haduh mynta katba nang iaid ki sngi, nang hiar ka rukom synshar khaddar”, la ong u Bah Pasi.
Katkum ka jingong u Bah Pasi, kaba kongsan eh ba ka district council kan thaw ain ka long halor ka shongkha shongman kaba ktah jur ia ka jaitbynriew Khasi na ka shongkha khleh palat.
“Ki kynthei Khasi ki shongkha bad kiwei ki jaitbynriew khlem da don kano kano ka jingteh da ka ain. Ka district council kaba dei peit halor kane, kam leh eiei”, u la ong.
U la ong ba ki nongmihkhmat mynta ki long tang kum ki niangkohnguh ki bym tip eiei ia ka jingmut jong ka District Council namar ki leit sha District Council tang na ka bynta ka jingmyntoi ialade shimet.
Ha ka jinghshisha kum ki nongmihkhmat sha ka District Council ki dei iada ia ka riti dustur, khyndew ka shyiap,ki lum ki wah khamtam ia ka jinglong khasi.
Wat ia ki Rangbah shnong haduh mynta ym pat lah ban ithuh da ka ain, ka District council ka don na bynta kaei, la buh jingkylli une u Rangbah bad bynrap ba ka District Council ha ka jaka ban pynkup bor ia ki Rangbah Shnong hynrei ka khnoit pynban ia ki.
U la ong ba ha ka jingshisha lada ka District council ka treikam hok balei yn donkam ia ka ILP namar ka dei ka kamram jong ka District Council ban iada ia ka ri bad ka jaidbynriew.
Katkum ka jingong une u Rangbah u la ong ba ka rukom treikam jong ka District Council mynta kam long kumba la pruid dak ha ka 6th Scheduled.
Ha kajuh ka por u la kynthah ruh ia ki paidbah ba kidei ki paidbah kiba jied ia ki nongmihkhmat tang da kaba shah pynbeij ha ka pisa.
U la kyntu ba kidei ban jied ia ki nongmihkhmat kiba tip bha iaka synshar khaddar bad kiba khuid.