Ki MDC ki dei ban pule bha ia ka Sixth Schedule: Prof. L.S Gassah

Shillong,19 Jylliew:
Mynta ka sngi ka Legislative Secretariat jong ka Khasi Hills Autonomous District Council, ka la pynlong ia ka Seminar lane ka jingiasyllok halor ka phang ‘Sixth Schedule to the Constitution of India’ lane ka bor jong ka Sixth Schedule ha ka Riti Synshar ka ri India. La pynlong ia katei ka Seminar ha Conference Hall , MDC Hostel, bad u nong kren halor katei ka phang (Resource Person) ha katei ka Seminar u dei u Prof. L.S Gassah, u nong hikai Political Science jong ka skul bah NEHU.
U Babu Gassah, ha ka jingai jingkren jong u , u la kren shaphang bun kiei kiei kiba ia dei bad ka Sixth Schedule bad kumjuh ruh ki bor ka District Council. U la ong ba ka Sixth Schedule kam dei ba ka sniew, hynrei ka dei ka jingbym lah ki nongmih khmat ban pyntreikam ia ka. U la ong ba ki nong mihkhmat ki don ia ka bor ba katei ka Sixth Schedule ka la pynkup bor bad kaba ki dei ban pyntrei kam ban pynbha ia ka imlang sahlang. U la pynkynmaw ruh ba baroh ki MDC ki dei ban pule bha ia ka Sixth Schedule namarba ka dei ka bor kaba la pynkup ha ki, “Ki MDC ki dei ban pule bha ia ka Sixth Schedule namarba ki don ia ka abor, ban pyntreikam katkum da ka Riti Synshar jong ka Ri India” ong u Babu L.S Gassah.
U Babu Gassah u la pynkynmaw ba ha ki snem ba la dep, ka la don kawei ka sien kaba u la ia kynduh bad ki MDC, bad kaba phylla ka long ba ha kata ka jingiakynduh, u la phah rah kti ia ki 30 ngut ki MDc mano napdeng jong ki kiba la pule ia ka Sixth Schedule, bad na ki 30 ngut ki la don tang 3 ngut kiba rah kti, “Na ka 30 ngut don tang 3 ngut kiba pule ia ka Sixth Schedule” iathuh u Babu Gassah uba la hikai bun bun snem ha ka subjek Politikal Saian.
Ha katei ka Seminar u la kren ruh shaphang ka Para 12A kaba don hapoh ka Riti treikam ha kane ka jylla Meghalaya , u la ong ba kiwei pat ki jylla ki la dep ban pynduh noh ia katei ka Para, hynrei hangne ha jylla pat ym shym la lah, u la iathuh ba ha jylla Mizoram ki don ia ka Para 12B, bad ha Assam ki don ia ka Para 12, hynrei ha ki ar tylli kitei ki jylla la pynduh noh ia kitei ki Para 12, lait noh tang ha kane ka jylla, u la ong ba lehse katei ka jingbym lah ban pynduh ia ka Para12A ha kane ka jylla ka lah ban dei ba ka don haei re haei ka jingioh nong , kaba ka jubab jong kata ka dei beit ka Politik.Ban pynduh ia ka Para12A , u Prof. Gassah u la ong ba donkam ia ka jingmynjur ka Ing Dorbar bah ha Delhi, ka Parliament. Ki la don ruh ki jingkylli kiba la wanrah da ki nongwan ia shim bynta ha katei ka Seminar, ki la don ruh shibun ki jingiakren shaphang ka District Council , ha katei ka prokram kaba la neh 2 kynta tam.
Ha katei ka sngi la ia donlang ka Shongknor ka Ing Dorbar ka KHADc ka kong Teilinia Thangkhiew, u shongknor ba-ar u bah Pyniaid Sing Syiem, ki MDC ka KHADC ba kynthup ia ka kong Grace Mary Kharpuri, u bah James Ban Basaiawmoit, bah Jansing Tynsong, bah Donevan Kharwanlang, bad kiwei pat ba kynthup ia u MLA ka Mawshynrut u bah Witting Mawsor, u Judge ka District Council Court, bad kiwei pat ki riew pawkhmat.