Ki MDC ka Congress ki dang pyrkhat, kumno kin ai skhim ia ki paidbah, haba ialade ruh kim ioh tulop, ong u bah Shibun

Shillong: U president ka BJP Meghalaya u bah Shibun Lyngdoh u la kam ba ka jingbym wan ki 4 ngut ki MDC ka Congress na JHADC ha ka por ba wan iasoh ki MDC ka UDP sha ka BJP ha ka taiew ba la dep, ka dei namar ba kim pat dep ban pyrkhat bha.

Hynrei ha kajuh ka por, u la kam ba kin sa wan hadien ba kila dep ban pynbeit bha namar ba mynshwa ka la don ka jingpynmih khubor khohreh.

“Ka jingjah ki 4 MDC ka Congress ka long namar ba ki dang pyrkhat bad kim pat long khreh bad kin sa wan”, la ong u bah Shibun bad bynrap, “Kin sa wan kham hadien bad ym tang 4 ngut kin don ruh kham bun”, la kam u president ka BJP.

U la ong ba ka jingiasoh na kawei sha kawei kam don jingkhang ha ki district Council. Katkum ka jingong u bah Shibun ka jingwan iasoh ki 4 ngut ba mih na UDP, ka dei namar ba ki sngew bad iohi ba dei tang ka BJP kaba lah ban pynlait im ia ka JHADC hadien 7 bnai khlem ioh tulop naduh ki nongtrei haduh ki MDC.
“Ka daw ba ki iasoh sha ka BJP ka long ba ki bud nuksa kum ha Mizoram ha kaba ki MDC ki iasoh sha ka BJP namar ba ki kwah ban pynsted ia ka jingpynkylla ia ka 6th Scheduled”, u la ong.
U la ong ba ym tang ma ki, kiwei kin wan ruh. “Lada ki don ha ka party ngi lah ban iakren ia ki jingeh”, la ong u bah Shibun bad u bynrap, “Haba ialade kim ioh tulop, kumno kin ai skhim pynroi ia ki paidbah”.
Lah ban kdew ba kham mynshwa, u MDC ka UDP ha JHADC ba iasoh sha ka BJP, u bah Lakhon Biam u la kam ba ka JHADC kam pat ioh pisa ban siew tulop ia ki MDC bad kumjuh ia ki nongtrei la 5-6 bnai eiei mynta.