“Ki MDC Congress, ki dei ban khreh ban mih noh na ka kynhun U bah Pynshngain”

Shillong, 14 Nohprah:
“Ki MDC ka seng Congress, ki dei ban khreh ban mih noh na kane ka kynhun, ba la ialam da U bah PN Syiem” ong uwei na ki nongialam jong katei ka seng sain pyrthei, u bym kwah ban pynpaw kyrteng mynta ka sngi.
Utei u rangbah, u kren diaw mynsiem shibun eh, halor ka jingkhot ia ka dorbar kyrpang mynta ka sngi, da U bah PN Syiem bad ha kaba la jied ia u dkhot shu sieh ban ai kyrteng ha U Lat, u bym dei satia u dkhot jong ka seng Congress bad uba dei u nongbishar ba la shongthait.
“Ngi la nang mutdur, ba kin jied ia U bah CB Syiem bad ia utei ngim don jing ujor eiei ruh em, namar ba u dei u briew jongngi” ula ong biang. “Une u briew um shym la pyrkhat ia kaei kaba ka Congress, ka la pynheh pynsan, haduh ba un da don ha kane ka kyrdan”. La ong biang utei u nongialam “Dei kane kein, kaba ki ong husiar ia u bsein, ba ynda u lah syaid, un sa puh kylla” bad ula ong shuh shuh ba lada U bah PN Syiem, u dang kwah ban dang iai don ialade ha ka seng Congress, u dei ban pyrkhat bad ban kylla, lymne ki paidbah jong ka Constituency jongu, kin sa ai jingsneng, ha ka elekshon ka ban sa wan ha u snem 2018.