Ki maw ki bym long, la siang ia ka surok Pyndensakwang, ong ka KSU

Shillong:Ka Khasi Students’ Union Pyndensakwang Unit, ka la ia kynduh bunsien bad u Executive Engineer, ia u Sub-Divisional Officer PWD Roads Maw kyrwat, South West Khasi Hills District, bad ruh ia u Contractor ha kaba ia dei bad ka rukom pyntrei ia ka surok PMGSY naduh ka lad Photumnew haduh hapoh shnong Pynden sakwang.

Ka jing ia kynduh, ka dei hadien ba ka ophis PWD ka la dep ban test ia u maw bad ka la pass ruh,ha kaba ki don katto katne ki maw ki bym long ban pyntrei. Kumta na ka liang ka seng ka kyntu ia ka tnad ba dei peit, ia u Contractor ban un phah kit noh ia kito ki maw ki bym long ban pyntrei bad ban kham pynsted ia ka kam. La kyntu ruh ba un trei bha kat kum ki kyndon ka Surok PMGSY,namar kum ba ka long mynta ka jingpyntrei ia kane ka surok ka kham suki, bad kane ka buh jingeh ia ki paidbah nongleit nongwan.

La ong shuh shuh ba ka seng ka pdiang kylluid ia baroh ki kam pynroi, kiba wan ha kaba shit bashai, hynrei kata kam kam pynroi kam dei pat ban pynroi tang ia u briew shimet lane tang ia u contractor, hynrei ia ki paidbah ka dong ka thain baroh kawei. “Ngi khmih lynti ba ka jingpyntrei ia kane ka surok kan bit kan biang nangne shakhmat bad ngi da kwah eh ba katkum ba la buh ha ka guideline hapoh khatar bnai u contractor un pyndep ia ka kam” ong ka kyrwoh.