“Ki Managing Committee, ki dei ban buh jingkylli ia ki nonghikai kiba pep”

Shillong:U Symbud Myntri rangbah ka jylla, u bah Prestone Tynsong, u la buh ka jingkylli ia ki Managing Committee, kiba la thung kam ia ki nonghikai Adhoc, ba balei kim shim ia ka jingkitkhlieh ban leh eiei, haba ki nonghikai ki pep ia ki kam jong ki ban hikai ia ki khynnah skul jong ki.

“Ki nonghikai Adhoc, ki dei ki nong trei jong ki Managing committee jong ki skul bapher bapher kiba la thung kam ia ki bad mynta ka sorkar kan iakren bad kine ki Managing Committee ba ki ruh ki dei ban mih shakhmat ban iarap lang ia ka tulop jong ki, namar ba ka sorkar ka ju siew kyllum ia ka pisa kum ka jingiarap”la ong u bah Tynsong.

U la ong, ki Managing Committee, kiba la thung kam ia kine ki nonghikai ki dei ban shim ka jingkit khlieh ban mih shakhmat ba kin buh ka jingkylli ia ki nonghikai kiba la pep ia la ki jong ki duty jong ki bad ia kane, na ka liang ka sorkar kan sa bthah shen.
Ki Managing Committee ki dei ban shim ka jingkitkhlieh ba lada kino kino ki nonghikai ki jah na skul, ki managing Committee ki dei ban leh eiei halor kane ka bynta pyrshah ia kine ki nonghikai”u la bynrap.
U bah Prestone, u la kyrpad ia ki nonghikai ba ki dei ban iai shah halor kane ka bynta, namar ba ka sorkar ka la iaid shakhmat ban pynurlong noh ia kine ki jingdawa jong ki bad u la kyntu ruh ba kim dei ban shah ialam bakla ha ki katto katne ngut ki briew halor kane ka bynta.

U bah Tynsong u la ong, ka jingia khih shong kyllain myngngor da ki nonghikai adhoc ka long kaba sngewsih bad mynnin u myntri ka tnad pule u la pynlong ia ka jingialang bad ki nongialam jong ki nonghikai Adhoc, ha kaba u la pynshai ba ka jingpynkiew ia ka tulop ia ki nonghikai ka dei sa tang ban ap ia ka por, ban urlong namar ba ia ka jingbishar bniah ia kane ka jingdawa ka la iaid shakhmat na ka liang ka tnad pule puthi, ka tnad pla pisa bad ka tnad planning.

“Hynrei na ka liang ki nongialam ki nonghikai Adhoc, ki la kyntait ban pdiang ia kane bad nga kyndit ban iohi ba balei kine ki nonghikai kim shym la pdiang ia kane bad ki dang bteng ka jingiakhih” u la ong.
“Nga kyntu ia ki nonghikai baroh ba kin leit phai noh sha la ki jong ki skul bad ban pyrkhat ia ki khynnah skul, namar ba kam don kano kano ka lad ban weng ia kine ki jingeh da ka ba shong ha surok”u la bynrap.
U bah Tynsong u la ong “Halor kane mat la dep ban rah ar sien ha ka jingialang jong ki kynhun myntri bad ngi donkam ban ia kren sa shisien ha ka jingialang kynhun myntri ban ioh shim ia ka rai bad ki nonghikai ki dei ban sngewthuh ia la ka jingkitkhlieh sha ki khynnah skul”.

“Kan ym don kano kano ka sorkar ka ban lah ban shu pynkiew tulop noh mynta mynta, namar ba ka sorkar kan dang donkam ban bishar katno kan lah ban pynkiew”u la bynrap.