Ki lynti ban sumar, ia ka sniehdoh na ka bynta ki shynrang

Kong L Kongwang

“Ha kaba iadei bad ka jingsumar ia ka sniehdoh mynshwa bun na ki shynrang ki ju leh bym phikir ia la kajong ka sniehdoh bad ieh kumba ka long.Hynrei ha kane ka juk kaba mynta la sakhi ba kham bun ki shynrang ki la sdang ban phikir bad shim khia iaka koit ka khiah jongka met ka phad bad khamtam ki shimkhia ban sumar iaka jong ka sniehdoh haka durkhmat bad u niuhkhlieh. Ym tang katta ,ka jingshimkhia ban sumar ia ki dohksah ,ban pyniphuh samla ia ka dur khmat kadei kaei kaei kaba sdang ban suhthied ha ki shynrang briew bad kane ka dei kaba bha na ka bynta jongki. Kaba kongsan eh na ka bynta baroh, kynthup iaki kynthei ne shynrang ka long ban tip bad sgewthuh iaka jait sniehdoh kaba ki don. Ki don kiba don ia ka sniehdoh kaba stang,kaba pdeng, kaba tyrkhong, kaba long lati lane kaba kynthup lang baroh.

“Tip bad sngewthuh shuwa ia ka jait sniehdoh ba phi don khnang ba kan iarap ia phi ha ka ba sumar iaka snieh doh bad jied iaki jingsleh kiba iadei bad ka sniehdoh jongphi.“Ban kyntiew ia ka koit ka khiah jongka sniehdoh manla ka sngi na ka bynta ki shynrang briew, harum ki don katto katne ki jingai jingmut da ki riew shemphang kiba phi lah ban bud ryntieh.

1. Ka jingdih um :– Ka long ka ba donkam ban pynbiang ia ka jinglong um ka met la ka dei na ka bynta ba shapoh ne kaba shabar ka met. Ka jinglah ban dih shibun ka um kan iarap pynkhuid bad pynlong koit long khiah ia ka sniehdoh . Phi lah ruh ban theh shi drop ka chlorophyll ha ka um ban kyntiew shuh shuh ia ka jinglong um ka met .Ban lait na ka jinglong tyrkhong ka long kaba donkam ,kumta ki shynrang ki donkam ban dih la kumno kumno 10 klat ka um ha ka shisngi ban pyntikna halor ka jinglait ka met na ka jingtyrkhong. Lada dih shibun ka um ,ki jakhlia hapoh ka met ruh ki mih bad wallam ka jinglong khuid bad itynnad ka sniehdoh. phi lah ruh ban bam shibun ki soh,ki jhur kine baroh ruh ki lah ban iarap pynum iaka snieh doh.“

2. Kiar naka ba bun jingmut jingpyrkhat:– Ka jingbymlah ban tehlakam iaka jingbankhia jongka jingmut jingpyrkhat ka lah ban pynlong ia ka snieh doh jongphi kaba jngem ,mih khniang bad kiwei kiwei ki jingeh kiba dei bad ka sniehdoh jongphi. Ban kyntiew iaka koit ka khiah jongka sniehdoh bad ka jingkoit jingkhiah jongka jingmut jingpyrkhat, shim iaka sienjam ban tehlakam iaka jingban khia ka bor pyrkhat. Buh kyndon bad pynbiang por ia ka ei ba phi dei ban leh bad leh ia kino kino ki kam kiba lah ban ai jingkmen, kane kan iarap pyllait na ka jingbankhia ka jingmut jingpyrkhat da ka ba leh kumne kan pyllait na ka jingshahktah ka sniehdoh jongphi .“

3. Ka Jingpynkhuid :– Ka jinglah ban sait pynkhuid ia ka sniehdoh ka dei kaba donkam .Ka jingsaitkhuid iaka sniehdoh ka dei kaba lah ban ai jingmyntoi ha kaba weng ia ki cell sniehdoh kiba la iap kiba pynlong naka daw ki puipui ,ki jakhlia,ki bacteria,kiba sahkut ha ka sniehdoh. Ka jingpynkhuid iakine ki cell sniehdoh kiba la iap na ka sniehdoh jongphi kan pynioh ia ka jingkoit jingkhiah bad ka jingkhuid ha ka sniehdoh jongphi. Da kaba leh kumne ,kan wallam ka durkhmat kaba itynnad bad khuid .Ki don katto katne ki jingtah ba phi lah ban pyndonkam na ka bynta ban sait pynkhuid ia ka sniehdoh ki kynthup ia u sohjew, strawberries,ki snep soh,ka doi bad kiwei kiwei .“

4. Kiar ban pyndonkam sabon:– Katkum ka jingwadbniah la shem ba khambun na ki shynrang ki ju mlien ban sait ia ka durkhmat da ka sabon. Ka sabon ka pynduna halor ka jingpynbiang phylla ka PH haka sniehdoh bad kane ka wallam halor ka jinglong tyrkhong ,ka jingtyrha bad wat ka jingmih ki niangmong. Kumta kiar na kaba pyndonkam daka dabin haka durkhmat bad ka long kaba bha lada phi lah ban pyndonkam da ki jingsait khmat (face wash)kiba iahap bad ka sniehdoh jongphi. Teng teng phi lah ruh ban pyndonkam da ka ngap bad ka kait ban lait na ka jinglong tyrkhong ka sniehdoh .“

5. Kiar naka jingdih sikret :– Une udei uwei naki jait jingdih uba wanrah ia shibun ki jingeh ha ka liang ka koit ka khiah jongka met khamtam ha ka ba iadei bad ka sniehdoh. Ka jingdih ia u sikret ka pynkhim ia ki thiedsnam kiba don ha ka snieh doh jongphi kaba lah ban kyntiew halor ka jingduna ka jingtuid bha ka snam bad kane kan pynblad noh ia ka durkhmat jongphi bad kane ka pynlong ia ka sniehdoh jong phi ban ring sti ,thoh laiñ bad ring tymmen kloi kham bunshah ban ia kaba phi mut dur. Kumta kan kham bha ban kiar shi syndon naka ba dih ia u sikret ban lait na bunjait ki jingpang jingshitom ha ka ba iadei bad ka met ka phad bad ka sniehdoh ruh.“

6. Kiar na ki Jingbamthiang :– Kalong kaba bha ban kiar na kino kino ki jingbam ba jur ka jingthiang namar ki dei kiba lah ban kyntiew halor ka jingtyrha. Kham jied ban bam kham bun ki soh,bad ki jhur namar kine ki dei kiba lah ban iakhun pyrshah ki jinglong tyrha bad kidei kiba dap da ka jingdon ki antioxidants kiba ai jingmyntoi halor ka koit ka khiah jong ka sniehdoh.“

7.Ka jingiohthiah bha :– ka jingbym iohthiah pura bun sien ka ktah iaka bormet bad ka bor pyrkhat bad kane ka ialam sha ka jingshah ktah kylla ka sniehdoh. Phi dei ban thiah la kumno kumno 8 kynta ha ka shisngi kadei kaba biang tam naka bynta ban kyntiew halor ka jingitynnad bad phuh ka sniehdoh. Haka por thiah, ka met ka iarap ban maramot iaka sniehdoh bad pynmih ka collagen kaba iada naka jingmih khniang haka sniehdoh bad iarap kyntiew halor ka jingtuid bha ka snam. Haba khein kyllum, ka jingiohthiah bha bad thiah biangpor ka kyntiew iaka koit ka khiah ha baroh ki liang.“
Khublei.