Nongstoiñ: “Ki lum rit kiba don hapoh West Khasi Hills, kiba nga la iohi ha lynti shwa ba ngan poi sha Nongstoiñ ki long kiba itynnad bad ithiang shisha ha kaba ki ia syriem ruh kum ha ka ri Switzerland” ong u Tathagata Roy u ba dei u Lat ka Jylla Meghalaya haba u la wan ban jngoh ia ka Nongstoiñ.
U-Lat-ka-Jylla-u-Tathagata-Roy-katba-u-dang-ai-jingkren-ha ka-jingialang-kaba-lyngkot-ha-DC-ophis-Nongstoiñ.
Ha katei ka jingwan jong u Lat ka jylla ka la don ruh ka jingiakynduh lang jong baroh ki ophisar sorkar na ki tnad treikam bapher bapher jong ka District kaba la long ruh mynta ka sngi hapoh Conference Hall jong ka ophis u Deputy Commissioner ka West Khasi Hills, ha ryngkat ka jingiadonlang ruh u DC ba thymmai ka District u bah T. Lyngwa, u Superintendent of Police, u Syiem ka Hima Nongstoiñ, ki riew rangbah jong ka thaiñ, ki nongialam niam, nongialam skul bad kiwei kiwei.
Na ka liang jong u Lat haba ai jingkren ha katei ka jingialang kaba lyngkot u la ong ba ka jingthmu ka jong u ban wan jngoh ia ka Nongstoiñ, ka dei shi bynta na ka jingbthah jong u Myntri Rangbah jong ka Ri India u Narendra Modi bad u la ong ruh ba ym tang ia ka Nongstoiñ, hynrei u hap ruh ban leit ha kylleng ki District jong ka Jylla khnang ban ioh ia phylliew jingmut bad ruh ban tip ia ka jinglong jingman jong ki briew.