Ki longkmie na ka shnong Mawlong, kiba shimkhia ban kyntiew ia ka roi ka par bad ka bha ka miat ha shnong ha thaw

Nongpoh: Ha ka sngi kaba ki nongkitkam ka Seng Kynthei Shnong Mawlong Nongtluh, ki la pynlong ia ka jingkynduh lang (General Meeting) kaba shisien shisnem, ki nongmihkhmat ha Nongpoh Constituency, kiba kynthup ia u Bah Mayrald Born Syiem, MLA bad kynjuh ia u Bah Balajied Rani, MDC, ki la ai ka jingiaroh kaba khraw eh ia ki longkmie na katei ka shnong, kata hadien ba ki la iohi bad lap ba ki longkmie na katei ka shnong, ki dei kiba longkloi na ka bynta ban iakit iabah ia ki kam ha shnong ha thaw, na ka bynta ban wanrah ia ka roi ka par bad ka shongsuk shongsain hapoh katei ka shnong.

Lyngba katei ka jingiakynduhlang kaba shisien shisnem, ki Longkmie na katei ka shnong, ki la ai ka jingiaroh kaba khraw eh ia kito ki Longkmie kiba la lah ban pyniatylli ia ki para Longkmie hapoh ka shnong ka shnong bad kaba la neh haduh kine ki sngi, kiba la iatylli ban iatreilang ha ka ban wanrah ia ka roi ka par bad ka bha ka miat ha shnong ha thaw.

Haba ai jingkren ha katei ka sngi, ki nongmihkhmat na Nongpoh, ki la ai shisha ia kata ka jingiaroh kaba khraw eh ia baroh ki Longkmie hapoh ka shnong Mawlong, namar ki dei ki Longkmie kiba iaryntih eh ha ki kam ban iatrei na bynta ka bha ka miat bad ka roi ka par hapoh ka shnong bad kiba la ong ruh ba ka nuksa kaba la pyni da ki Longkmie na ka shnong Mawlong, kan da long ruh ka nuksa sha kiwei ki longkmie kiba sah ha ki shnong bapher bapher.

Ha katei ka sngi, Seng Longkmie na Mawlong, ka la pynkup burom ia u heprit Iomanly Dkhar, u heprit uba dang 11 snem ka rta na shnong Mawlong Nongtluh, uba la lah ban leh ia ki kam shlur da kaba pynlait im ia la u jong u para uba la ngam jyllop ha kawei ka pung kaba don ha katei ka shnong, nalorkata ki la pynkup burom ruh ia ka Kong S. Mawphniag, ka longkmie kaba la ai ka jingshakri ha katei ka shnong lyngba shibun ki kam, nangta sha ki ASHA, Aganwadi kiba la trei borbah ha kane ka khlam Covid-19 hapoh katei ka shnong.

Ka Kong I Khymdeit, kaba dei ka nongialam jong ka Seng Kynthei Shnong Mawlong Nongtluh, ka la pynpaw ba kum ki longkmie, ki la mad hapdeng shibun ki jingeh ha ka jingiaid lynti jong ki ha ka ban shakri sha ka imlang ka sahlang, hynrei kim shym la kynran dien ban iai trei na ka bynta ban wanrah ia ka bha ka miat bad ka roi ka par ha ka imlang sahlang bad khamtam eh hapoh katei ka shnong.