Shillong, 14 Naiwieng:
U Myntri khynnah ka sorkar pdeng ba peit ia ka tnad pla tyngka bad Corporate Affairs u Arjun Ram Meghwal, u la ong ba ki lad pynmih ding ki don bun kum na ka sngi, na ki wah, na lyer bad kaba donkam ka long ba ka North Eastern Council (NEC) kan sa pynkhreh ia ka projek na ka bynta ban mang pisa ka sorkar pdeng.
“Ki don ki jingeh ha ka jingpynmih ding, ngi don ar ne lai tylli ki lad ban pynmih ding kum na ka sngi, ka um, bad ka lyer. Ngi la iakren ha ka NEC mynta, bad ka donkam ban pynkhreh ia ka plan ban aiti sha ka DoNER bad kan sa phah sha ka tnad pla tyngka ba kan bhah pisa ha kane ka dorbar ban sdang ha ka 16 tarik Naiwieng”, u la ong.
“Lada phi duna pisa, ka sorkar pdeng kan sa rah da ka supplementary demand ha Parliament kaban sdang naduh ka 16 tarik Naiwieng. Ngan bthah ia ka tnad pla tyngka ba kan buh ia kane hakhmat khnang ba ngin lah ban pass ha kane ka dorbar bad ka NEC kan sa ioh bun ka pisa”, la ong u Meghwal.
U la ong ruh ba ka pisa na ka NLCPR la iakren ha kaba ki ophisar ka NEC ki la kyrpad ba lada ka sorkar pdeng kan pynlait beit sha ka NEC, kan sa lah ban pyntreikam bad peitngor khambha ia ki kam ba pyntreikam.
U la kyntait ba ka la don ka jingpynduna bhah ia ka pisa hynrei u la ong ba ka sorkar pdeng kan sa mang pisa khambun ia kane ka thain.
“Nga pynthikna ba ha ka jingmang tyngka kaban wan, ka NEC lane ka DoNER kin ioh pisa kham bun”, u la ong.
Phi don ban ong eiei?