Ki kyrtong ba don dak sniew, ki hap pynmih ha ki kotkhubor, ong ka ECI

Shillong:Ka Election commission of India (ECI) ka la bthah ia baroh ki kyrtong ki ban ia khun ia ka elekshon, ki ba don ki dak sniew (criminal cases) ba kin pynmih ia ki, ha ki lad pathai khubor, la ki dei ki kotkhubor ne ki electronic media.

Ka tnat elekshon ka la hukum ba lada ki don ki kyrtong, kiba la ngat ha kino kino ki kyndon aiñ pyrshah ia kino kino ki kam sniew ba ki la leh ki hap ban pynmih ha ki lad pathai khubor haduh lai sien kynthih, ia kita ki kam sniew ba ki la leh khnang ba ki paidbah ki lah ban tip, lada ki dang kwah ne em ban kyrshan ia u/ka, kata ka dei ka kamram jong ki nong thep vote, ka kamram jong ngi ka long beit ban buh khnang ba ki paidbah hi kin ioh jing tip bad ban iathuh ruh sha ki paidbah kloi katba lah, la ong u CEC, haba ia kren bad ki nong thoh khubor ha nongbah Shillong, ha ka sngi thohdieng.

U la ong ruh ba kito ki parti kiba rai ban ai tiket ia kito ki briew ki ba don dak sniew, ki ruh ki dei ban pynshai paidbah. Ki dei ban batai shai sha ki paidbah, balei ba ki rai ban ai tiket ia ki tei ki briew, hato ka don jingeh bha ban ioh ia u kyrtong u ba khlem don kino kino ki kam sniew, ha kito ki constituency, ki seng saiñ pyrthei ki hap ban pynmih paidbah ha ki lad pathai khubor, khnang ba ki paidbah kin tip bad ha ka kyndon aiñ aiu ki la shah pynngat, la ong u Kumar.

U Kumar u la iathu ruh, ba ki kynhun pahara,ki ophisar ha ki jaka thep vote kin ym lah ban tip shaei kin leit bad ki kynhun pahara ruh kin ym lah ban tip ka kynhun jong ki kan leit shaei, u la ong.