“Ki kynthei kim ioh ia ka hok ban im laitluid, la knieh noh ki riew bymman”

Nongstoin, 28 Nailur:
Ka seminar halor ka phang “National Seminar on crime against tribal women” kaba ar sngi lynter ia kaba la pynlong da ka Nongstoin College la pynkut noh mynta ka sngi ha kaba u bah K.P Pangniang MLA ka Rambrai u la long kum u kongsan ha ryngkat ka jingiadon lang u MDC ka Nongstoin bah L.G. Nongsiej kum u symbud kongsan.
Ia katei ka seminar la ioh ruh ban plie pyrda da ka Dr.Ampareen Lyngdoh myntri ka tnad Information & public relation jong ka sorkar Jylla kum ka kongsan ha ka jingialang kaba la long hapoh ka Conference Hall jong katei ka College ha ka sngi ba ar jong ka taiew.
Haba kren kum u kongsan ha ka sngi pynkut ia katei ka seminar u bah Pangniang u la ba katei ka seminar ka long kaba don kam haduh katta katta, bad kaimlang ka sahlang ka dei ban ieng kyrkieh na ka bynta ban ia khun pyrshah ia kiba bun ki jingshah thombor ia ki kynthei .
“Haba ngi peit ha ki kot khubor manla ka sngi ngi iohi bad ioh sngew ba ka kam thombor ia ki kynthei ha ka Jylla kala nang iai kiew katba nang mih ki sngi bad kaba sngewsih kalong ba ki kynthei kim ioh ia ka hok ba kin im laitluid namar la shah knieh noh ia ka hok ka jong ki ha ki riew shim kabu bad ki riew bymman” ong u bah Pangniang.
Shuh shuh u la ong ruh ba ngi don kam ban ai ka jingiada kaba kyrpang na kabynta ki kynthei hapoh ka jylla, bad ban ai bor ia ki kynthei kadei ka sien jam ban pynbha ia ka kyrdan jong ki bad ki kynthei ki dei ki budlum ha ka imlang ka sahlang bad kalong kaba don kam eh na kabynta ka imlang ka sah lang ban ia khun ia ki ba bun ki jingshah thombor jong ki kynthei.
Ha katei ka semimar la wan ban ia shim bynta ruh da ki nongkren ai jingpynshai kiba kynthup ia u professor S.Patil Directorate lifelong & extends ion education Mumbai university, Dr.Neelam Borwankar Associate professor Department of political Science Deshbandhu College university of Delhi bad kiwei kiwei.
Kumban shu ban shu pynkynmaw ba I kong Ampareen Lyngdoh haba ai jingkren ha ka sngi plie pyrda ia katei ka seminar I la ong ba ka sorkar jylla kala leh ia kaba bynta kaba bha tam ha ki snem ba lalah da kaba wanrah ia ki skhim kiba kyrpang ban iarap ia ki longkmie lane ki kynthei kiba don ha kajingeh.
Shuh shuh I la ong ruh ba ki kynthei ki don kam ban don ia kajingshlur ban ieng na kabynta ka hok bad ban pynsawa ia ka sur kaba pyrshah ia kum ki tei ki jingshah thombor.
Nalor ki kongsan bad ki nongai jinghikai kiba la wan na bar ka Jylla ha katei ka sngi la don lang ruh u principal jong ka College u bah B.K.Laitflang, ki nonghikai, ki khynnah pule , kumjuh ki pulit jong ka women police ka thanad Nongstoin bad kiwei kiwei.