Ki kynthei hangne la niew burom, ha kiwei ki ri, hap siew dawri, ong u Lat

Shillong, 06 Naiwieng:
“Ka Dong Mihngi ka dei kaba kham kyrpang khamtam haba ia ki kynthei la niew burom bha. Ki don ka bynta ha ka jingim ba man ka sngi bad ka long markhong pong ha kiwei ki jylla ha kaba ia ki kynthei ym shah ban shong kurim khlem siew pisa dawri (dowry)”, la ong u Lat ka jylla u V Shanmuganathan haba kren ha ka jingialang rakhe dap 25 snem ka North Eastern Service (NES) ka All India Radio, Shillong mynta ka sngi Thohdieng bad bynrap, “Kumjuh ka jingkhuid ka dei ka lynti jong ka jingim jong ki paidbah kane ka Dong Mihngi. Ki briew ba don ha ka Radio ki dei ban pyrshang ban wanrah ia ka jinglong jingman ha kaba kiwei ki bynta jong ka ri kin tip ia ki jinglong kyrpang kane ka Dong Mihngi”,.Haba pynpaw ia ka jingsngew ieit jongu ia ka AIR, u Lat u la ong ba u sngew tynnad eh ia ka All India Radio bad baroh u ju rah ia ka radio rit sha kano kano ka jaka ba u leit ban sngap. U la iathuh ba dang shen u la thoh sha u Myntri Rangbahduh ka ri ia ka prokram “Mann Ki Baat” kaba ju pynphriang man u bnai lyngba ka AIR da kaba pyntip ia ka jingkhuid ka shnong Mawlynnong bad na kane ka daw, u Myntri Rangbahduh u la pynmih ia ka shnong Mawlynnong ha ka jingkren jongu ha ka radio ka prokram Maan Ki Baat. Ha kane ka sngi, ka NES, AIR ka la pynlong ia ka jingpyni ia ki kolshor bapher bapher jong kane ka Dong Mihngi bad la sam khusnam ruh sha ki briew kiba ju noh synniang.Shwa ia kane, ka NES, AIR Shillong ka la pynlong ruh ia ka jingiathir halor ka phang ka jingshakri jong ka Radio ha ka imlang sahlang. Ka Dr. Helen Giri ka khlieh ba shong thait ka Creative Art ka North Eastern Hill University (NEHU) ka la ong ba ka North Eastern Service, All India Radio, Shillong ka la long ka rynsan jong ki jaitbynriew kane ka Dong Mihngi.Ka la ong ba namar ba ka Dong Mihngi ka dei kaba don bun ki jait bynriew ba sah ha ka,ka jinglong kyrpang ka NE India, AIR ka lah ban leh ia ka bynta ba kongsan bha ban pynpaw ia ki jinglong kyrpang jongki. Kiwei pat kiba kren ha kane ki kynthup ia u Rubaiyat-ul-Ali, Technical Director ,NIC, Guwahati, u Ashish Bhatnagar bad kiwei de.