Ki kynthei ha ki dorbar shnong

Bah RM Shabong

Ka Meghalaya High Court, ka la pynmih ia ka rai jongka, ba ki kynthei ruh ki donhok ban jied Rangbah Shnong bad katei ka long halor ka jing ialeh mukotduma na ka bynta ka kam jied Rangbah Shnong ha Nohwet, Khyriem Syiemship.

Ka sobjek lyngkot ka long ba kane (la imat), kumba ka dei ka juk jong ki kynthei, wat la ha ki pateng kiba mynshwa, kim ju don ki kynthei kiba mihkhmat ha ki dorbar shnong, lane ba ki shait ong ba kynih ka iar kynthei, hynrei mynta pat ka long kaba shisha, ba ki la don ki shnong kiba ailad ia ki kynthei ha ki kam dorbar shnong, khamtam ha ki shnong ha sor.

Mynta ka mih ka phang, ba haba ki kynthei ki la don hok ban jied Rangbah Shnong, kumta ka la dei ban don ka rai, la ki hima Khasi, Jaintia bapher, kin ailad ne em ia katei ka rai jong ka jingkylla, kaba la shim da ka kashari ne kin ialeh pyrshah ban ailad ba ki Syiem, ki Dolloi, ki Sirdar bad ki Rangbah Shnong kin long beit tang ki shynrang bad ka phang hangne, ka long ba lada la ailad ia ki kynthei ba kin jied Rangbah Shnong, kumta ki dei ban don ia ka hok ruh ban long Syiem, Sirdar, Dolloi lane Rangbah Shnong bad kata ruh ka long lada ki dei na ka jait Syiem (kaba lah ban sa kylla kham hadien) bad kumta ter ter.
Lyngba ka rai jong ka High Court, kan jin da la bha namarkata ia ki khlieh nongsynshar Hima, lane ia ki District Council, ba kin kren shai halor katei ka mat bad kata ka long, la kin ailad ne em ia ki kynthei ba kin thep vote ha man la ki jingjied dorbar Shnong, dorbar Raid, dorbar Hima bad lada jia ba ki la mynjur, ba kin thaw ia ki ain kiba shai bad ba kin trei kam salonsar, khlem da niew shiliang khmat iano iano ruh, lada dei ha sor ne ha nongkyndong.
Ka jingngeit jong uba rim, ka long halor ka jinglong shynrang bad ka jinglong rangbah lane ka jingdon tmain bad ka jing bym don tmain bad ka dorbar shongkun bad shongblei, hynrei ha kine ki sngi, ki la bun ki rukom pyniaid hima, kiba ngi la iaid lait bad kiba ngi la klet noh bad ka synshar ka khadar, la iohi, ba ka la iaid bad bud ryngkhi ia ka sain pyrkhat jong ka jinglong jingman ha India lane kata kaba ki ong ka electoral democracy bad kumta, kane ka dei ka por ba kan don ka jylli pyrkhat jong ki riew shemphang ban pynbeit kyrkieh lane pynduh syndon ia ka jingsngew iapher hapdeng u khat arbor bad ka kynthei shibuit shibor.