Shillong:Ka seng Hynniewtrep Youth Council (HYC) ka la kynnoh ba ka Notice Inviting Quotation (NIQ) kaba la pynmih ha 10 tarik Nailur 2024 da ka Directorate ka Housing, Meghalaya, ka la wanrah ka jingsma her ba ka don ka jingleh buit tuh ban ai kam kontrak tang ia kano kano ka kompeni ne ki kontraktor kiba shna ia ki tin sopïing ha Meghalaya ban suplai tin sopïing sha ka tnad, kaba kot T.69,65,00,000/.
Haba kren sha ki lad pathai khubor mynta ka sngi, u President ka HYC u bah Roykupar Synrem u la kam ba ki kyndon jong ka NIQ, la shna ha kata ka rukom ba kan ai bor ha ki briew kiba don ha ka bor ban rai iano ban ai kontrak, ha kaba ki kyndon ki la kdew ba tang ki nongkhaïi kiba dei na ki karkhana ne kiba shna ia ki tin sopïing ha ka jylla Meghalaya kiba lah ban iashim bynta ha ka jingthep tender, khlem da kdew ba ki dei ban long kiba tbit ne kiba khlem pat tbit ruh.
U President ka HYC u la ong ba ha ka Technical Bid ruh, la dain tdong ia ki kyndon kiba iadei bad ka jingdon pisa kiba thep tender khnang ban ai lad ia kiba don ka jingiadei da kaba buh ba ki dei don tang T.1 klur shaneng na bynta ka kam kaba haduh T.69,65,00,000 katba ha ka NIQ pat kaba la pynmih ha ka 11 tarik Rymphang 2022, ka kam kontrak kaba tang T. 20 klur, buh kyndon ba ka jingdon pisa u kontraktor kam dei ban duna haduh T. 10 klur ban iashim bynta ha ka tender.
U President ka HYC u la ong ba kine ki kyndon ha ka NIQ kila wanrah ka jingartatien jur halor ka jinglong khuid kane ka tender.
U la ong ba ka seng ka sngew khia namar ba ym pat don ki kompeni ha ka jylla kiba lah ban iashim bynta ha kane ka tender bad na kane ka daw, ym don shuh ka jingiakop hapdeng ki kontraktor ha ka liang ka dor bad ka jingbha jong ki tiar ban suplai.
Bad kane kan pynmyntoi ia ki katto katne da kaba pyndonkam bakla ia ka pisa u paidbah namar ba ka tnad Housing kan hap ban pdiang ia ki dor kiba buh ki kompeni.
Ka ne ka sorkar ba mynta te la palat shisha, ko ki para ba ngeit to ngin ia kyndit bynriew ha shwa ba ka jait bynriew kan troiñ ha ka party ki dkhar..