Ki kyndon pyniaid kam (SOP) ha ka lehniam Puja

1. Jinglong
   Kane ka dulir pyniaid kam ka batai shai ia ki lad jingiada kiba dei ban bud ha ka por ka jinglehniam Puja ban iada na ka jingsaphriang u COVID-19 bad la pynkhreh ia ka hadien ka jingiaphylliew jingmut bad ka Central Puja Committee (CPC).
2. Ki lad jingiada kyllum
   La ai jingmut ia ki briew kiba la palat 65 snem, ki briew kiba don kiwei ki jingpang, ki longkmie ba armet bad ki khynnah kiba hapoh 10 snem karta ba kin shong ha iing. Ki Puja Committee kin pynthikna ia kane.
   Ki lad jingiada kyllum ki kynthup ia ki lad iada jingpang kiba dei ban bud ban teh lakam ia u COVID-19. Baroh ki dei ban bud ia kine ki lad jingiada (ki nongpyniaid bad ki paidbah).
   Kine ki kynthup:
   i. Dei ban pyniajngai iwei na iwei kumba 5 phut ha ki jaka paidbah.
   ii. Dei ban pynthikna ba baroh ki deng ia ki jingda khmat/mask
   iii. Dei ban pynmlien ban sait ia ki kti da ka sabon (kumba 40-60 sekhon) wat lada ki kti ki khuid, lane pyndonkam ruh bad ki dawai sait kti ba don alcohol (kumba 20 sekhon).
   iv. Dei ban bud pyrkhing ia ki lad iada jingpang. Kane ka kynthup ia ka jingda ia ka shyntur bad khmut haba jyrhoh/synriah da ki tissue/rumal/tymbuit bad bret ha ka rukom ba dei ia kine ki tissue ba la dep pyndonkam.
   v. Sngap thuh bha ia la ka koit ka khiah bad haba sngew shitom dei ban pyntip mar mar sha ki bor ba dei peit ha ka jylla bad distrik lyngba ki nombar iarap.
   vi. Dei ban mana pyrkhing bha ia ka jingbiah pathar ha ki jaka paidbah.
   vii. Dei ban ai jingmut ia baroh ba kin buh bad pyndonkam ia ka Aarogya Setu App.
3. Ki Pandal
   Ki Puja Committee kin pyntip sha ki Deputy Commissioner ne ki SDO (Civil) ia ka jingpynieng ia ki puja pandal. Dei ban bud ia kine ki jingbthah harum kiba iadei bad ka jingpynieng ia ki Puja Pandal:
   i. Lah ban shah ban pynieng ia ki pandal katkum ka jingdonkam jong ka Puja Committee. Hynrei, ym shah ban pynieng ia ki pandal ha ki surok PWD. Ki committee kin peit ba dei ban shna ia ki pandal da kaba buh jingmut ia ka jingwan ki briew.
   ii. Dei ban pyllait ia ki pandal katba lah ban ailad ia ka jingrung jingmih ka lyer. Ki mandir kiba la don lypa ki lah ban sah beit kumto.
   iii. Dei ban buh ki jingker ban pynbeit ia ka jingrung jingmih ha ki pandal. Ym dei ban buh ia ki khyrdop pdiang sngewbha ha ki surok PWD. Dei ban buh ia ki CCTV ha ki sawdong sawkun jong ki pandal.
   iv. Kum shibynta jong ka jingiada jingpang ha ka por ka jinglehniam puja, dei ban pynbiang ha baroh ki Puja pandal ia ki dawai bad ki tiar iada na ka ding, kynthup ia ki dawai pynlip ding bad ki borti shyiap.
   v. Ki Puja Committee ki dei ban pyndait ia ki bording ha ki surok bad lynti ban leit sha pandal.
   vi. Ki khyrdop ki dei ban don ki dawai sait kti ba shu pynieng lane ki jaka thet kti bad ki kor thew jingshit.
4. Ka jingpynbeit ia ka jingiaid ki nongleit jngoh/riewngeit
   Baroh ki Puja Committee ki dei ban pynkhreh ia ki plan ban pynthikna ba ym dei ban ialum bun briew palat ha ki pandal da kaba buh ha ka jingmut ia kine ki kyndon harum:
   i. Dei ban buh la ka jong ka jaka rung jaka mih ia ki riewngeit bad ki nongleit puja. Dei ban phah wan suki suki ia ki riewngeit bad ym dei ban palat ia ka shibynta na ka laibynta ka jingngiam ka pandal. Dei ban buh ki volunteer ha ka jaka rung bad ha ki jaka ba donkam ban pynthikna ia ka jingwan suki suki ki riewngeit.
   ii. Dei ban buh ki volunteer ban peit ba ka don ka jingpynpajih para briew bad deng ia ki mask.
   iii. Dei ban pynbiang ki dawai sait kti bad buh dak ban pyniajngai para briew.
   iv. Katba lah, dei ban thew jingshit ha khyrdop ki puja pandal. Baroh ki briew ki dei ban deng ia ki mask. Shuh shuh, ka Puja Committee ka dei ban da thoh kyrteng bad nombar mobile jong baroh kiba rung sha pandal ban pynsuk ia ka jingbuddien ia ki briew ba iakynduh, lada donkam ban leh kumta.
   v. Dei ban pynbiang lypa ka jaka ha kawei pa kawei ka pandal ban pynkyrpang ia ki briew kiba suba ioh pang. Dei ban pynbiang lypa ka kali bad ki nongniah ban kit ia ki briew kiba pang/ne don dak jingshitom.
   vi. Kan kham bha ia ki paidbah ba kin nym mih shabar na shnong/jaka jong ki. Ki Puja Committee ki lah ban pynsngewthuh paidbah ia ka jingpyrkhing ia ka iaid ka ieng na kawei ka shnong sha kawei pat. Ki Puja Committee ki lah ban buh ka jingkyrpad ia baroh ki riewngeit khnang ba ki briew ki lah ban shong beit ha la ki jong ki shnong. Ki Puja Committee ki dei ban pynsngewthuh bha khnang ba ki briew kin nym leit jngoh palat ia ka 1-2 tylli ki pandal.
   vii. Yn nym shah ia ki briew kiba long Positive bad High Risk ban leit sha ki puja pandal lane ban mih shabar ha ka por ka jinglehniam puja. Yn pynshitom katkum ka ain ia kiba leh pyrshah ia kane.
   viii. Ka tnat ka koit ka khiah ka lah ban phah ia ki doktor ban iarap ia ki Magistrate bad ki pulit kum ki Sector Health Officer ha man ki sector. Ki lah ruh ban leit sha ki jingialang jong ki sectoral bad sub-committee.
5. Ki durblei
   Ki Puja Committee ki la rai ban leh tang ki jinglehniam Puja katkum ka Hindu Almanac:
   i. Baroh ki durblei ki dei ban long tang shi jaka bad kim dei ban jrong palat ia ka 5 phut. Ym shah ia ki riewngeit ban ktah ia ki dur blei.
   ii. Ki nongpyniaid kin pynbeit ia ka jinglehniam puja bad jingtyrwa Anjali.
   iii. Dei ban pynbynta ia ka jingai jingtyrwa. Ym shah ban shong bad shimbynta ha ka jingbam prasad. Lah ban shu sam ia ki prasad kiba la song bha ia ki nongwan bad ki riewngeit.
   iv. Ym shah ban iabam sngi ne sam ia ki jingbam ba la shet. Yn shah tang ban sam ia ki jingbam ba la song.
6. Ka jingpynngam ia ki durblei
   i. Ki Puja Committee ryngkat ka jingiaphylliew jingmut lang bad ki Deputy Commissioner ne SDO (Civil) kin rai ia ka por bad katno tylli ki Puja Committee ki lah ban pynngam ia ki durblei ha ka jaka ba la buh ban pynngam.
   ii. Ym shah ban iaid proseshon ha lynti ban leit pynngam ia ki durblei.
   iii. Ia ki Puja Committee kiba kit bad ki durblei, yn shah tang 15 ngut ryngkat bad artylli ki kali rit bad kawei ka kali heh (kham lah ki Pickup Van) ban synran ia ka durblei sha jaka pynngam blei.
   iv. Ia ki Puja Committee bym kit bad ki durblei, yn shah tang 9 ngut ryngkat artylli ki kali rit.
   v. Ki Puja Committee kin jied da ka kyrteng ia ki dkhot ki ban shong ha ki kali bad yn ai da ki identity card. Baroh ki briew kiba donkti ha kaba rah ia ka durblei ki dei ban ioh jingbatai bha shaphang ki lad jingiada na u COVID-19. Namar hap ban pynpajih para briew, ki committee ki dei ban plan bha ia ka rukom rah bad kit ia ki durblei kynthup ia ka jingpynngam.
   vi. Dei ban pynkhreh ia ka rukom iaid da kaba iasyllok bad ki Superintendent of Police lane SDPO bad dei ban ioh jingbit na ki SP ne SDPO ban pyndonkam ia ki kali ha ka sngi pynngam durblei.
   vii. Baroh ki committee ki dei ban bud thik ia ka por ban iaid khnang ban nym pynkhapngiah ia ka jaka pynngam durblei. Ki Sector Magistrate ki dei ban peit ba ki briew ki mih na ka jaka pynngam ha ka por ba la buh. Ka dei ban don ka jingiatreilang hapdeng ki magistrate, pulit bad ki committee kiba don ha ka jaka, ha surok bad ha ka jaka ba sdang ban kit ia ki durblei sha jaka pynngam.
   viii. Ka jingpynngam durblei ka dei ban kut hapoh ka 3 baje janmiet. Dei ban bthah ia baroh ki puja pandal ban pynthikna ba ki la pynbit pynbiang lypa ban lait na ka jingpynslem ha kaba mih na ki pandal sha ka jaka pynngam durblei. Baroh ki Puja Committee ki dei ban pynthikna ba baroh ki sub-committee ki dei ban bud pyrkhing ia ki por kaba la buh na ka bynta ban pynngam ia ki durblei. Yn shah tang 5 ngut ki briew ban rung sha ka wah pynngam durblei na ka bynta ki jinglehniam puja/pynngam.
   ix. Yn nym shah ia ki nongpeitkai/ki nongiaid lynti ba kin ieng peitkai ha ka por ba pynngam. Ka CPC ka dei ban ker bha ban khanglad ia ki nongpeitkai ban rung sha ka jaka pynngam.
   X. La mana pyrkhing ia ka jingpynngam ia ki durblei ha ki wah lait tang ha ka jaka ba la buh ban pynngam, bad dei ban bud pyrkhing ia ka jingpynbeit ia ka rukom pynngam ia ki durblei ka bym pynsniew ia ka mariang bad ban pynduna ia ka por pynngam.
   xi. Dei ban bud pyrkhing ia ki jingbatai kiba la pynmih da ka CPCB/MSPCB kiba iadei bad ka jingpynngam ia ki durblei katkum ki ain iada mariang. Yn pynbud ia ka jingpynngam durblei da kaba weng ia ki tiar leh puja kum ki syntiew, ki sla bad kiwei bad ym dei ban bret ia ki ha wah.
7. Ka jingpynkhuid
   i. Ki Puja Committee ki dei ban lehkhuid ha ki Puja Pandal ha ka por bad hadien ba la kut ka jinglehniam.
   ii. Ki Puja Committee ki dei ban pyniakhlad ia ki niut naduh na Puja Pandal. Dei ban pynbiang ki jaka iarap kiba don volunteer ha man ki pandal ban pynkhuid ia ki jaboh.
   iii. Ki Puja Committee ki dei ban bud ia ki jingbthah jong ka Central Pollution Control Board bad Meghalaya Pollution Control Board kiba iadei bad ka ain iada ia ka mariang bad ki sawdong sawkun.
   iv. Ka CPC ryngkat ka Shillong Municipal Board ka dei ban pynkhuid ia ka jaka pynngam blei shisngi hadien ba la kut ka jinglehniam.
8. Ki jingbtin lynti kyllum
   i. Namar ka curfew miet ka dang treikam naduh 10 baje mynmiet, baroh ki jinglehniam ne lehkmen Puja dei ban pynkut shwa ka 9 baje mynmiet.
   ii. Ym shah ban pynlong ia ki jingialehkai, sport bad ki prokram tynrai ha ki sngi Puja.
   iii. Ym dei ban pynriam ne pynphuh pynphieng palat ia ki pandal bad dei ban pynduna ia ka jingpyndait ia ki light.
   iv. Ki Puja Committee kin phah sha ka ophis jong ki Deputy Commissioner ia ka list jong ki dhakies/ki nongtem bom kiba wanrah na shabar ka jylla ryngkat bad ki jingtip ia ki jingpynbeit ia ki jaka shong pynkyrpang na ka bynta ban ioh jingbit. Kine ki briew ki dei ban leh ia ki test bad ban bud ia ki kyndon shong pynkyrpang jong ka jylla.
   v. Dei ban pynbeit ia ki plan jong ki sectoral bad sub-committee ryngkat bad ki Sector Magistrate, ki pulit bad ki nongtrei ka koit ka khiah ban pynthikna ba ka don ka jingiatreilang ha baroh ki bynta.
   vi. Haba don lad, ki Puja Committee ki lah ban leh live streaming ia ki jingduwai bad kiwei ki jinglehniam ban ai bynta lang ia ki briew ba la tymmen, ki khynnah bad ki briew kiba don jingpang ki bym lah ban leit sha ki Puja Pandal.

Sd/-
(M.S. Rao)
Chief Secretary
Government of Meghalaya