KI KULAR YN PYNDEP KATKUM KI KYNDON AIN, U BA DONBOR HALOR BAROH

Rev. B.P.Pohsngap

Nga pynpaw ia ka jingsngewnguh ia ki kot khubor baroh, kiba la trei shitom miet la bad sngi, ban trei shitom ban pynmih ia ki khubor, jingtip, ba tikna bad ba shisha, ba ka Ri bad ka jaitbynriew kin ioh ia kiei kiei kiba jia ha kylleng ki jaka. Ka long ruh ka lad ba ki kotkhubor ki kit ia ki khubor ktien Blei sha kito baroh kiba ieit ban pule bad ban long ka jingkyrkhu ia ka jinglong mynsiem. Nga ngeit kiba trei shitom baroh kin long jingmyntoi ruh ha ka met. Ka ktien U Blei ka ong “ u nongtrei un ioh la ka bam”.

Ha kane mynta nga don kane ka jingiasyllok na ka ktien U Blei na ka kitab ba ar ki Khronikl 7 Lynnong, 14 ka dkhot , kaba ong kumne, “ LADA KI BRIEW JONG NGA, KIBA LA KHOT DA KA KYRTENG JONG NGA, KIN PYNRIT IALADE, BAD KIN DUWAI, BAD KIN WAD IA KA KHMAT JONG NGA, BAD KIN PHAI NOH NA KI LYNTI BYMMAN JONG KI; KUMTA TE NGAN SNGEW NA BNENG BAD NGAN MAP IA KI POP JONG KI, BAD NGAN PYNKHIAH IA KA RI JONG KI”.

Kane ka dei ka dkhot kaba khraw shibun eh, man ki jingiaseng duwai jong ki briew ha ka pyrthei kat kiba la ngeit ki pyndonkam bha ia kane. Kum ha kane ka por bad ka iia jong ngi ruh, la ioh sngew na ki briew jong U Blei, kiba iai kren bad pynkynmaw, da kaba la sngewthuh shai kdar, ba kat kum kane ka khlam kaba shyrkhei – covid-19, kaba la sngewjlep ban sngap ia ka khubor ba nang kiew nang kiew ka jingiap sha kylleng ki Ri ba khrawbor jong ka pyrthei. Na kane ka jingjia, ka la pynrit mynsiem bha ia ki briew. Teng teng i kumba ki briew ki la shu khih lynga, khlem da pyrkhat bha, kaei ka ban jia. Ka dohnud ka mynsiem jong ki briew baroh naduh ki heh ki hain, ki rit ki ria, la kyrmen bad khmih lynti tad lano ban ioh ka khubor jingkmen, ban iohsngew, oh! Ha kata ka Ri ka la hiar kumta kumta, bad ha ka North East Meghalaya jong ngi khamtam. Katba ma ngi ki briew ngi nang ia khih kum ki ksain ha kane ka sla khyndew, ryngkat ka jingsngew khraw, sngew sarong, uwei pa uwei ha la ki jong ki jingsngewsarong, kaba ia kynti kynnoh uwei ia uwei pat. Katba nga dang pynleit jingmut ban thoh ia kane nga kynmaw ia ka jingialap uwei na ki Pastor Rangbah ka Synod ha Thangbuli (War Jaintia) I Rev D. Kalain , nga don ha kata ka jingiaseng, I la ai nuksa ia ka jinglong briew, I ong ngi ki briew ngi long kum ki ksain, ynda la ia lang ki ksain, uwei ruh u kwah kiew sha jrong, uwei ruh u kwah kiew sha jrong, uto uba ha jrong eh, sa katto katne por u la poi sha trai eh, kumta shi kumta kut hajuh. Katba ha ka jinglong briew ngi ia long kumno kumno ruh, to ngin tip ia katei ka jingshisha kaba khraw, ba don Uba halor tam Uba la dep buh lypa ki ain ki kanun ba u khun bynriew un im un iaid da ki ha sla khyndew. U Blei Um ju kylla, ki ain jong U kin nym kylla, to ngin peit ia kitei ki jingkren jingpynmaw ha “ U Solomon mynmiet”, U Trai U la ong ha U, lada nga khang khop ia ka bneng ba yn nym don slap, lane lada nga hukum ia u puit ban bam duh ia ka Ri. Lane nga phah IA KA KHLAM , hapdeng ki briew jong nga”. Baroh ki mynsiem briew ha ka pyrthei, ki long ki jong U Blei, hynrei U kham ban bad kham pynpaw, “KI BRIEW JONG NGA KIBA LA KHOT DA KA KYRTENG JONG NGA”. Kane ka kham thew ia kiba la tip ia U Blei bad ia kiba la ngeit. To ngin peit ia ki “KYNDON AIN UBA HALOR BAROH”. Kita ki long :-

1. “BAN PYNRIT IALADE” :- ka lynti jong ka jingsngewrtit, ka jingim kaba lehrit, ka dei ban synshar ia ngi ki briew iwei pa iwei. Lada ngim don ka jinglong kaba nang ban “pynrit ialade” para briew nyngkong, da lei lei ruh ngin nym sngewthuh ban pynrit ialade ha khmat Uba don bor halor baroh. Lada ka jinglong lehrit, sngewrit, pynrit kam don , ha la ing, ha shnong, ha thaw, ha ka Balang ba ia don ne ha ka Ri ka Jaitbynriew, ka jingduwai da ka mynsiem sarong kan paw, U Blei Un nym iohsngew.
2. “BAD KIN DUWAI” :- U Blei U la iohi, naduh ba bna ia une u khniang corona, la ia duwai, la ia duwai, bad la sngewthuh ka pyrthei baroh kawei ka la duwai ha la ki jong ki jong ki jingduwai bad yn nang iai duwai, U Apostol Paul U ong, “To duwai khlem da pud”. 1 Thes 5:17
3. “KIN WAD IA KA KHMAT JONG NGA” :- Kane ka bynta ka syriem kum ka jingduwai hi, hynrei ka dei ka por kaba kita kiba donkam jingiarap, ka la dei ka por kaba thmit bha, ym shuh tang kum ka jingduwai, kane ka ladei ka kyang kut lad ba la sngewthuh ne ithuh ym don por shuh wat ban duwai, la shu peit beit ki khmat sha U ba don ka bor halor baroh. Ki khun Israel mynba ki don ha khmat ka duriaw, “ Ki khun Israel ki la khmied la ki khmat, ban peit shadien ki shipai u pharaoh ban peit sha khmat ka duriaw basaw, la dei ka por ban shu peit beit sha jrong sha U Blei ba ka jingiarap kan wan kloi. Don ka jingrwai kaba ong- “Peit sha jrong shaneng, sha U Blei; peit sha jrong sha khmat jong U, Peit sha jrong , wat sheptieng ei ei, peit sha jrong sha U Blei”. U Moses u ong ia ki; “Wat sheptieng, khmih ia ka jingpynim U Trai “, U Blei U la pyllait ia ki, ki la lait im.
4. “KIN PHAI NOH NA KI LYNTI BYMMAN”:- Ban duwai ne wad ia ka khmat U Trai, lada ka jinglong bymman ka dang synshar ha ka jingim, U Trai Un nym sngew bad lada phai khmat sha U ruh, Un nym phai khmat, namar ka bor ka pop ka jinglong bymman ka khang noh ban ioh sngew ne iohi ia U Blei ha ngi. Kumba ngi ialeh ban lockdown ialade, na ka hukum ka sorkar, to ngin lockdown ialade na ka jinglong laitlan, long lyngkar ha ka long briew man briew, ka pop kaba la jyllei la kum ka umsaw barong na phang ia ki briew ba im khlem sheptieng Blei shuh. Kiba kum kine ki jinglong bymman ki paw tyngkrein ha ka Ri ba ieit jong ngi. Nga kyrmen kane ka jingjia ba mynta kan long kawei na ki jingmaham U Blei ba tip ba U Blei U ba don bor halor baroh.

Ka bynta ba khatduh :- Lada kitei ki kyndon ain, la pyntrei kam hok ia ki, U Blei U la kular ban leh la ka bynta. (i) Un sngew ia kaba ngi la pan la kyrpad, “ Kumta te ngan sngew na bneng” (ii) “Ngan map ia ki pop jong ki (iii) “Ngan pynkhiah ia ka Ri jong ki”. Ngi sliang ngi thrang ban iohi ia ki kular jong U Blei ba kin long halor jong ngi. Nga duwai ba ki briew jong ka Ri ka Jaitbynriew jong ngi; kan sngewthuh kan iaid halor ki kyndon ain ba U Blei U dawa na ngi bad U Blei hi ha shuwa ba ngin pan ruh U la tip hi kaei ba Un ai ha ngi. U Blei Un kyrkhu ia kine ki jingpynkynmaw na ka bynta ka burom jong U hi ….AMEN……