Ki ksan rympei, ong U bah James ia kiba pyrshah Agrovet

Shillong, 17 Nohprah: Halor ka jingkynnoh ba ka KHADC ka khlem khot lut ia baroh kiba ia shah bad kiba pyrshah ia ka Meghalaya Agrovet Private Limited (MAPL) u EM ba peit ia ka khaii pateng ka District Council u bah James Sylliang u la ong ba katei ka jingkynnoh ka dei kaba bakla hynrei u la khot lut ia baroh kiba pyrshah bad ia kiba ia shah ruh, hynrei u la ong ba ka liang ba pyrshah kam shym  la wan sha katei ka jingshong bishar,kaba la long mynta ka sngi. Shuh shuh halor ka jingkynnoh ba u leh Politik u bah James u la ong “Ngam ju leh Politik ia ki paidbah, nga dei u Politishian nga leh Politik tang ha ki por elekshon”. Haba phai pat sha ka jingbym wan ka Liang Pyrshah sha ka Hearing kaba la long mynta ka sngi ha Hall MDC Hostel u la ong “Ki liang Pyrshah kim dei ban long kum ki ksan rympei rem dorbar”.
Hadien ka jingbishar, kaba la long mynta ka sngi u bah Sylliang u la ong ba u la iohi da la ki khmat ba u paidbah u la poi da ki spah ngut bad u la iohsngew ruh da la ki shkor ba u paidbah u kwah ban ai laisen noh ia ka Meghalaya Agrovet hynrei u la ong ba ka KHADC kan dang hap ban shong pyrkhat bad kan sa leh ia kaba donkam ban leh. Lah ban kdew ba ha katei ka Hearing la wan ban ia shim bynta da ki 18 tylli ki shnong kiba kynthup ruh ia ka Synjuk ki Rangbah Shnong Lum Manik Raitong, ka Synjuk ki Rangbah Shnong C&RD Umsning Block ki seng longkmie ka seng samla Lum Manik Raitong bad ki paidbah nongshong shnong katei ka thain kumjuh ruh kiba mih khmat ia katei ka MAPL.Ha katei ka hearing u Chairman jong ka Synjuk ki Rangbah Shnong C&RD Umsning Block u Bah Rocky Kylla u la pynpaw ba ka shnong jong u kaba dih ia ka um kaba wan na ka tyllong kaba don ha Mawthei kam pyrshah balei kiwei pat ki pyrshah.U Bah Enel Wahphlang uba dei u Adviser jong ka Synjuk ki Rangbah Shnong Lum Manik Raitong Area u la kyrpad ia ka KHADC ban ai noh ia ka Trading License jong ka MAPL namar ba kane ka company ka lah dep ban pynbiang lut ia baroh ki jingdonkam. “To ki don ki liang pyrshah mynshwa bad ngi ruh ngi mynjur ia kata namar ba kam pat lah ban pynkhuid ia ka jingpynjaboh ia ka wah hynrei mynta kane ka company ka la lah ban pynbiang lut ia ki jingdonkam baroh dei ban plie noh ia ka” la ong u Bah Wahphlang.