Ki Kristan ha ka jylla Meghalaya lah ban ong ba ki dei ki rit paid?

Shillong, 20’lyngkot:
Hato ki Kristan kiba don bun paid ha ka jylla Meghalaya lah ban ong ba ki dei ki rit paid? Ong ka Supreme Court ha ka lah sngi u Blei jong ka taiew haba shong bishar halor ka jingkyrpad ba dei ban kheiñ rit paid ia ki jaitbynriew Sikh kiba bun paid ha Punjab. Ka kashari ka la pynsyriem hapoh ing bishar ia ka jylla Megha laya bad Punjab da kaba ong ba ka Punjab ka dei ka jylla ba buntam ki Sikh hynrei ki kwah ban ithuh ia ki kum ki rit paid bad ka la buh jingkylli ba ha ka jylla Meghalaya bad Nagaland ruh ki dei ki jylla ba buntam ki Kristan hato ha kitei ki jylla ruh lah ban ong ba ki Kristan ki dei ki rit paid?.
Ka Constitution Bench jong ka Supreme Court ha ka lah sngi u Blei ka la rai ban peit bha ia kane la hato lah ne-em ban khot rit paid ia ki niam kiba bun paid ha kito ki jylla jong ki kaba kiwei pat ki tlot bha. Hato ia ki Muslim ha Jammu and Kashmir lah ban ong ba ki dei ki rit paid, ki Sikh ki lah ban long rit paid ha kiwei pat ki jylla hato lah ban ong lang ba ki dei ki rit paid ha Punjab ong katei ka kashari jong u Chief Justice T.S. Thakur bad justices F.M.I. Kalifulla, A.K. Sikri, S.A. Bobde bad R. Banumathi haba jubab ia ka jingkyrpad jong u nongiasaid rangbah u Rakesh Dwivedi uba la iasaid ba dei ban khein rit paid ia ki Sikh ha Punjab.
Katei ka kashari ka la buh por biang ban shong bishar ia katei ka kam hadien saw taiewbad ka kwah ruh ba u Attorney General Mukul Rohatgi bad u senior Advocate R. Andhyarujina ba kin long ki amicus curiae ban iarapia ka ing bishar ban shim rai halor katei ka bynta. Lah ban kdew ba ha kane ka jylla pat ka Niam Niam Khasi bad Niam Tre ki la kyrpad sha ka High Court ban khein ia ki kum ki rit paid bad katei ka kam ka dang sahkut mynta ha High Court.