Ki kotkhubor kim treh shuh ban thoh, ia ki ishu jong ki rit paid Tripura

Da U Monarch Shabong
Shillong, 26 Nailur:
Ha ka sngi balang, U Pastor PBM Basaiawmoit, ula phah ia kawei ka email sha U Rupang, ha kaba ula tyngkhap ia ka jingdawa jong ka Joint Action Committee (JAC) jong ka Tripura, na ka bynta ba ki pynpaw ia ka jingsngew pyrshah jongki, halor ka jingpynkylla sha ka Museum, ia katei ka iing jong ki Syiem hyndai jong ka Tripura. Kam dei tang ka jingpyrshah ia ka jingpynkylla sha ka Museum, hynrei, kaba ki kham pyrshah, ka long shuh shuh, ba la pyrshang ban weng noh ia ka kyntien Ujjayanta, kaba dei ka kyntien kaba rim jong katei ka iing Syiem ha Tripura.
Hynrei, ngim iakren eh, hangne ia katei ka phang, namar ka mat kaba kongsan, ka long ba utei u rangbah, uba don ha ka nongbah Agartala, ha katei ka sngi, ula iathuh ba baroh ki kotkhubor ha Tripura, kim treh satia ban pynmih ia katei ka kyrwoh jong ka Joint Action Committee, kaba la sam sha ki kotkhubor ha ka nongbah Agartala.
Une u nongthoh ula phone sha utei u rangbah bad haba iakren, ula shu iathuh lyngkot “Baroh ki kotkhubor ha ka nongbah Agartala, ki dei kiba la long trai lut da ki Bengalee”. Une u nongthoh nangta, ula kylli biang “Haba kumta, ym don kotkhubor kawei ruh, kaba la long trai da ki trai shnong Tripura” bad ka jubab na U Pastor, ka long “Em”.
La iathuh shuh da utei u rangbah, ba ha Tripura, ki MLA kiba dei ki trai shnong, ki don 20ngut ha ka iing dorbar, kaba 60ngut, tangba kim ju nud ban kren na ka bynta ka bha ka miat jong ki jaitbynriew Tripura, namar ba ki la long rit paid bad ba ki hap ban kohnguh ia ka jingbthah jong ki nongialam jongki, ha la ki jong ki jong ki Seng. Kitei ki MLA, ki don 19ngut na ka Left Front bad 1 na ka seng Congress bad ia ki jingeh jong ki rit paid trai ri ha Tripura, la ju shim bad ia said lem da ki seng, kiba kynthup ia ki Civil Society, Borok Peoples Human Rights Organisation, Twipra Students Federation nalor kiwei kiwei.
Na u nongthoh – Lada ki kotkhubor, kim thoh shuh ia ka jingeh jong ki trai shnong ha Tripura bad lada ki MLA, kim iakren shuh ia ki jingeh jongki, katei ka la pynshisha, ba ki trai shnong ha katei ka Jylla, ki la kylla long ki nongtong um jongno re. Ngin nym iakren jrong eh, hynrei, ha Shillong, ki ki dang don ki kotkhubor, kiba pynmih ia ka sur jong ki sengbhalang, ia ka sur jong trai shnong bad kumta ter ter.