Ki kotkhubor, ki long kiba donkam shibun, ong U Lat

Shillong, 7 Jylliew:
“Nga dei U Lat jong ki paidbah” ong U Lat thymmai ka Jylla, U V Shanmunathan, haba ia kynduh ha ka sngi thoh dieng bad ki riew shem phang, kiba wan na ki liang bapher bapher, kiba kynthup naduh ki nongia lam niam, ki nongtrei kam shakri ia ki shem lanot, ki nongpyniaid ia ki skul, ki kolej bad kiwei.
Na ka liang jong ki nongthoh khubor, la shim bynta da U bah RM Sha bong, President jong ka Meghalaya Editors & Publishers Association (MEPA) bad ha ka jing iakren ai khublei bad U Lat, une u nongialam ka MEPA, ula ong “Nga sngewnguh eh, ba phi dei U Lat ba nyngkong ban lum ia ki riew shemphang bad ki riewniam bapher ban iakren shaphang ka jinglong jingman jong ka Jylla, ha kaba wat ka sorkar kaba la jied da u paidbah ruh, kam ju khot, ia kaba kum kane ka jingiakynduh lang ban iakren ia ki riew shemphang halor ka roi ka par bad ka imlang sahlang”. U Lat, ula ong shuh shuh “Ki kotkhubor, ki long kiba donkam shibun , ha ka imlang sahlang”.
Na shibun ki riew shemphang, kiba la ia kren kylluid mynsiem bad U Lat, uba la leit sha man la ki jaka shong jongki, kiba don kumba 54ngut tam, ki pynpaw ba ka Meghalaya, ka dei ka Jylla, kaba shongsuk shongsain, ka Jylla kaba don ka jing ia burom hapdeng ka jingiapher jaitbynriew, kaba don ha kane ka Jylla.
Kiwei kiba don ban ia shongkai bad ia pyn ithuh ialade bad U Lat ki long U bah RG Lyngdoh, Vice Chancellor jong ka Martin Luther University, U Manas Choudhury MLA barim, U bah Toki Blah, U Phadri jong ka All Saints Cathedral Church of North India, U Rangbah Rev Presley B Lyngdoh, U bah Rana Kharkongngor, uwei na ki nongrwai ba khraw jong ka jaitbynriew; ki nongialam jong ka Seng Khasi, ka Ramakrishna Mission bad sa shibun kiwei de ki rangbah bad ki longkmie ruh kumjuh. Kaba sngewtynnad na katei ka jingiakren, ka long ba U Lat, u da ong ia ki “Sngewbha sa wan mih tyngkhat” bad ula iakren ruh bad U Phadri jong ka All Saints Cathedral, ba u kwah ban leit sha ka jingiaseng jongki, ha kaba U Phadri, u ai jingmut ba ka sngi kaba biang eh, ba un leit kan dei ha ka por rakhe Khristmas.