“Ki kot khubor ki jah ba jur ka jinglut ia ka jingmih”

Shillong, 29 Risaw:
U Bah Erwin K Sutnga uwei na ki trai ba ju don bynta ban pynmih ia ka kot khubor kum u Pateng Mynta, ka Leilieh; hynrei kiba jah noh mynta, u la ong ba ka daw ka jingjah ki kot khubor ka dei nama ba ka bun ka jinglut bad ka duna ka jingmih, nalor ka jing duna ka jingkyrshan na ki paidbah ban pule ia ki kot khubor.
Haba iakren mynta ka sngi, u Bah Sutnga u la ong ba ha kito ki por mynshwa, ka rukom shon kot khubor ka long kaba eh bha, namar ba kam long kaba suk kumba long ha kine ki sngi.
“Mynshwa ka jing shon ia ki kot khubor, ka long kaba eh, namar ka mashin ka long ka bym dei kum ha kine ki sngi kaba kham suk”,la ong u Bah Erwin.
Katkum ka jingong u Bah Erwin kiwei pat ki jingeh ki long ka jingbym biang ka jingsam khubor, ka jingbym ioh jingpyn bna ne advertisement. “Ha kito ki por ki nongpule kot khubor ki don tang ha Shillong hynrei mynta ki kot khubor ki la poi sha ki jaka nongkyndong bad ki briew ki la iapule kot khubor bad ka la don ka jingiapher bak ly bak”, u la bynrap.
“Ngi pynlut da ki hajar shi sngi hynrei ka jingmih tang tang da ki spah bad ka jingjur palat ka jingdawa ban ia ka jingmih ka dei ka daw kaba kongsan ba ki kot khubor ki khyllem bad ki jah noh khamtam lada kim ioh ia ka jingkyrshan kaba biang na ki paidbah nongpule”, la ong Bah Erwin.U la ong ba ha kine ki sngi ki kot khubor ki la kham bha bun shah ban ia kito ki por mynshwa hynrei donkam ban pynbha shuh shuh.U la ong ba ki kot khubor ki dei ban pynbha ia ka rukom ai khubor ban nym ialam bakla ia ki paidbah bad ki donkam ban ioh ia ka jinghikai kaba biang ia kane ka kam.Ym tang katta, ka jingsiew ia ki nongtrei kot khubor ruh ka dei ban long kaba biang namar ba khlem ka jingsiew kaba biang ka shem jingeh ia ki ban trei bha ia ka kam namar ka jur ka jingdawa.”Ka jingsiew ia ki nongtrei kot khubor ka dei ban long kaba biang bad ka sorkar ka donkam ban peit ia kane namar ba ia ki lad pathai khubor la niew kum u paia ba saw ka synshar paidbah”, la ong u Bah Erwin.U la ong ba bun ki kot khubor kiba la jah noh kum u Lum Shyllong, Pyrta u Riewlum, bad kiwei kiwei kiba mih ban shakri ha ki por mynshwa.