Ki kompeni kim don jingeh, ka sorkar kam lah pyniaid ia ka MCCL: Khlur

Shillong, 11 Jylliew:
Ka BJP na kane ka jylla ka la iakhih da kaba shong kyllain mongor mynta ka sngi namar ka jingbym lah ka sorkar ban siew ia ka tulop ki nong trei ka Mawmluh Cherra Cement Limited (MCCL) kaba la kot 8 bnai tam mynta. Ha katei ka jing iakhih la wan ban snohkti lang ruh da ki nongtrei katei ka karkhana pynmih dewbilat na Sohra.
Haba kren sha ki nongthohkhubor u President ka BJP u bah Khlur Sing Lyngdoh, u la pynpaw ka jinglyngngoh ia ka jingbym lah ka sorkar ban pyniaid beit iaid ryntih ia ka jingtreikam katei ka karkhana kaba la pyniaid hi da ka sorkar, katba kiwei pat ki karkhana pynmih dewbilat jong ki kompeni shimet ki iaid beit shaid shaid bad ki ioh nong bha, “Ngam lah sngewthuh shuh, kumno ka sorkar kam lah pyniaid katba ki kompeni shimet pat ki treikam shaid shaid” ong u bah Khlur Lyngdoh uba la bynrap biang da kaba ong ba ka dei ka kamram jong ka sorkar lyngba u myntri rangbah ban peit ba katei ka karkhana ka dei ban treikam.
Lah ban kdew ba ki nongtrei ka MCCL ki la dawa ba nalor ka tulop jong ki kaba la 8 bnai tam mynta, ka sorkar ka dei ban pyntreikam noh ia ka karkhana kaba thymmai kaba don ha katei ka jaka , naba la pynsangeh noh ia ka karkhana kaba rim. Haba kren halor katei ka bynta u bah Khlur u la ong ruh ba ka long kaba sniewbok bad kaei kaei ka bym lah ban long ba katei ka karkhana kam treikam shuh mynta la shisnem tam, bad ia ka tulop ki nongtrei ruh ym don basiew.
Haba pynpaw ia ka jingsngewkhia namar ka jingbym lah treikam ka ba ka MCCL kaba dei ka pliang ja ki nong Sohra, u bah Khlur u la ong ba ka jingsangeh treikam ka karkhana bad ka jingbym ioh tulop ki nongtrei ka la ktah jur ia ka longing longsem jong ki ha kaba kim don pisa shuh mynta tang ban phah skul ia ki khun jong ki ruh, bad nalor ki nongtrei ka la ktah ruh ia ki paidbah ka thain Sohra kiba im ja na ka jingiadei ha ka ia die ia thied bad ki nongtrei bad ha kiba bun ki bynta kaba pynim kamai ia ki.
Hadien katei ka jingiakhih shong kyllain myngngor ka BJP ka la phah ruh da ka jingthoh sha ka sorkar ba ka dei ban pynsted noh ia ka kam ba iadei bad ka MCCL, khamtam ban pyntreikam noh ia ka karkhana kaba thymmai kaba la pynieng maw nongrim naduh ka 1 tarik u iaiong, 2005 bad kaba la mang ban pyndep hapoh lai snem hynrei mynta la shiphew snem ym pat lah ban pyntreikam ia ka.