Ki Khynnah Bam Ja Khluit

Da U Josper S Dura, Nongshken

La sot na ka kot “Ki Symboh Pyrkhat”
Ki khynnah bam ja khluit ki khih pisa bad lyng-a ynda haba ki la ngat ha ki kam rangbah, namar ki shu kynrup ruma khlem pyrkhat.
Nga kynmaw ia uwei u paralok jongnga u ba la shim ia ka jinglong kpa khlem da pyrkhat bishar ia ka jingkit ba u dei ban kit ban bah. Nga la sngewsynei ba u iathuh haduh katno ba u la shah niew bein ha ka kiaw kurim. La katta u ud, u iaineh hajuh. Ki sngi ki snem ki iaid khlem sngewthuh u la ioh lai ngut ki khun.
Ha kine ki lai phim lah niew la katno sien u la shong khynraw haiing kur. Ynda la bunsien eh ka leh khynnah, ka kmie ka la thnum ia ka khun miet sngi. Ka khun ruh ka la sngewsih sat ba shu ap ja bad ki khun na iing. Ka la thait, ka la ngiah bad ka la kut jingmut katba long.
“Haba phim mon shuh ban iashong bag nga, wad noh shawei ba nga ruh ngan khmih la ka lynti,” ka ong ia u. “Pha eh shisha, to ngam wan shuh sha pha,” la phaidien dom u kpa.
Lai bnai u bnai u ngen bad ha u ba saw u sngew kynmaw kmie hir-hir, hynrei lehrain ban jan mynsngi mynshai sha tyngkong ka kmie ki khun. U par mynmiet sor bad tok tok u tied na jingkhangit na khlieh thiah jong ka. (ym phylla mo, u lok u tip ia la lok hangno ka thiah),
Mano ita?
Manga, u kpa ki khun.
Men leit shano katta miet?
Nga kwah khmih khun.
O! Kumta, ap shipor.
Ka plie ia ka jingkhangit bad rah naba thiah uwei u khun hadien uwei pat.
Une u Number one, me iohi;
Une u Number Two, bad une pat
U Number Three.
Katto la biang.
Tdam ka khang ia ka jingkhangit bad u lok u peit mat seh kumba dei shi kuli. U ud, u bynniaw:-
Plie seh.
Ka khla kynthei na kren ka kyriat bnait bad ka byrngem:-
Me kwah aiu pat,
Ha i sur ba pynrit, wo mi hi kyntien:-
Nga kwah eh ia phi.
Shi kyntien na u nongsot ia katei ka khana lyngkot:
Khlem kut jingmut bad khlem ia sngewthuh jingmut ka mih ka jinglehrain. La ioh ne duh, phi ki samla wat ia kyrsum lang ha iing ki kiaw ki kthaw,khamtam lada don ki para shongkha kiba kham heh kyrdan ne kham don spah ban iaphi. Ka kiaw kurim (mother-in-law) kam dei ka kmie ba shisha jongphi (mother-in-fact), ka dei tang ka kmie ha ka ain. Kumjuh ruh, u kthaw kurim jongphi (father-in-law) u dei u kpa jongphi tang ha ka ain,um dei u kpa ba shisha jongphi (father-in-fact). Kine ki ieit ia phi um kum ia u khun, hynrei ki ieit iaphi namar ba phi dei u pyrsa kurim jongki. La ju iohi ia ki longing longsem kiba bira-biri ki nia na ka daw ka jingmushlia bad jingkorbar thanda ki kiaw ki kthaw. Ha iing ki kiaw ki kthaw, phin shu sngewpoh hi ialade. Phin sa shu sngewrit mynsiem . Phim ym sngewsuk ha mynsiem. Phin shu pyrkhat ruh ba kito kiba shonglang bad phi, ki peit niew bein ia phi. Phi kwah ban thiah sngi khyndiat haba phi sngewniun ka met, hynrei phi hap ban pynbor ialade ban khie dangstep. Phi kwah ban thiah dang shai ba thait ba jrem ka met haba la wanphai shaiing na ki jingtrei bad ki kam jongphi, hynrei phim nud ban leh kumta, namar phi sngewlehrain ioh kin ong ia phi u ba leh mon. Kum ban shu ia ong noh, phin sngew ba ki shiah ki thar na ka mon bad na ka diang, bad ba ki dieng-tyndung kiba nep ki iai kynthah bad iai dung ia ka mynsiem jongphi (inner torments). Phi ki samla shynrang phi long kynrad ha la i jong it rep i skum. Kaba shong sha jngai na i kiaw i kthaw ka jingieit ka suhsieng bad ka jingbha ka mih. Ha ka poitri, ka Biria u Bieit, u Myllung Soso Tham u thoh-
Lada don bneng ha snieh pyrthei,
Ha trep ne haiing, syiem,-
Ka dei ha Eden- ba arngut
Ki ia phylliew mynsiem.
Ki Proberd 17:1 Ki ong- Lah kaba shikyntien ka ja suda haba bad ka jingsuk, ban ia ka iing kaba dap da ka jingkhawai lem bad ka jingialeh.