Ki Khyndai Umdih Khyndai Umtong jong u Lum Shyllong

U Spiton Kharakor & Lyngdoh Nongkrem S. Pyniaidsuk, Hima

U Lum Shyllong (Shulong) u long u lum uba jrong tam ha ka Bri u Hynniewtrep, naduh ka shnong Khangsari (Moheshkhola) hapdeng ka South West Khasi Hills, ka South Garo Hills bad ka Bangladesh na shaphang shathie. Kumjuh ruh naduh shaneng shatei sepngi jong ka shnong Mawkuru, West Khasi Hills (Hima Nongstoin) bad ka North Garo Hills haduh ka wah Kupli ka dei ka ri jong ki khun u Hynniewtrep.

Kumjuh ruh ka nam jong u Lum Shyllong kum u Syiem rangbah jong ki lum, bad ki Khyndai Umdih Khyndai Umtong, ngi la klet baroh shikatta. Te mynta, ngin ia kynrong burom noh ia utei u Syiem jong ki lum ryngkat Ki Khyndai Umdih Khyndai Umtong jong ka ri ki Laiphew Syiem bad Khadar Doloi.

Ka Seng Khasi Nongthymmai- Madanrting Pyllun ha kane ka Seng Kut Snem kaba 120 kaba long ha ka 23 tarik u Naiwieng 2019 ka ai khublei Seng Kut Snem iaphi baroh ki parakur parakha ka Bri u Hynniewtrep. Ban pynphuh pynphieng ia ka jingiaid pyni Riti (Tableau) ka ban iaid naduh Madan Iew Rynghep haduh Madan Weiking, ka Seng Khasi Nongthymmai- Madanrting Pyllun ka rah ban pyni da ki Khyndai Umdih Khyndai Umtong jong u Lum Shyllong ban sakhi ba kine ki dang don bad dang neh haduh mynta. Ka khana ka long kumne:-
U Lum Shyllong u jrong haduh 6445 feet na sla duriaw. Shaphang mihngi na u, don artylli ki syntai lum kum u Lum Mynjneh ba peit ieid ia ka sor Shillong, uba mynta ki khot ia u da ka Shillong View’s Point. Shuh shuh shaphang mihngi na u Lum Mynjneh, don u Lum Sohmyllan jong ka shnong Laitkor. Une u Lum Sohmyllan u jrong haduh 6433 feet na sla duriaw, kumta u duna tang 12 feet ia u Lum Shyllong na sla duriaw. Na une u lum mih haduh lai tylli ki tyllong umdih umtong napdeng ki khyndai umdih umtong jong u Lum Shyllong. Ia une u Lum Sohmyllan ka Eastern Air Command jong ka Indian Air Force, ka ai kyrteng sin ia u da u Laitkor Peak.
Ki sawdong pud jong u Lum Shyllong ki long lun pyllun bad la jrein da ki Khyndai Umdih Khyndai Umtong. Kine ki mih na kliar, na syngkai bad na ki rashing lum jong u Lum Shyllong. Shaphang shatei, ka tuid ka wah Umshyrpi, shaphang mihngi la don uwei u Mawblei uba thiah shu ta-phah ha madan, uba ki khot u Mawblei. Une u don harum jong ka shnong Laitkor bad sha Sepngi jong ka wah Umkhen. Na shaphang shathie, la don ka Rangkyndur ha ka shnong Rang bih –bih ba kyrsoi ka wah Umtlieng kaba tuid shaphang ka wah Umiew. Shaphang Sepngi ka don ka shnong Mawkhan. Na kane ka thain ha sharing lum u Lum Shyllong la kyrsoi ka tynlong um, jong ka Um- Shyllong. Kane ka wahduid ka leit tuid shaphang sepngi da kaba iaid lyngba ia ka jaka jong ka Indian Air Force ha Umdiengpun sha Elephant Falls. Nangne pat ka sa leit iasoh sha ka wah Umiam Khwan hadien artylli ki kshaid ba noh rymphum.

Ia ka shnong Shillong mynshuwa la tip ia ka, da ka kyrteng IEWDUH haduh ka snem 1865. Hynrei ban sah ka nam im ka kyrteng jong u Lum Shyllong bajrong tam ha ka Bri u Hynniewtrep la pynkylla kyrteng bad la tap lubri noh da ka Iewduh, ka kyrteng barim sha ka shnong Shillong ban sah ka nam u Lum Shyllong naduh u bnai Jylliew 28 (Thursday) 1866. Kat kum ka Geographical Map jong ka Survey of India naduh Garo- Shillong haduh Haflong jong ka North Cachar Hills, Assam haduh ki lum Borail Range la tip ia ki kum ka Shillong Plateau. Shisien shisnem ki lymbit bad ki jait sim ba har rukom ki ju leit nohiap ha ka shnong Jatinga. Kane ka shnong ka dei ka shnong Hynniewtrep Pnar ba heh tam ha ri Assam.

Sawdong talawiar u Lum Shyllong, la ri la sumar da ki Ryngkew–u-Basan jong u ‘Lei Shyllong, bad ki khot sien burom ia ki kum kita ki Saw Basan jong u ‘Lei Shyllong. Kita ki long kumne :-
1. Ka Wah Umiew ne Umiam-Mawphlang ne wah Shella na shathie.
2. Ka Wah Umkhrah ne Umiam-Khwan na shaphang shatei.
3. Ka Wah Umkhen na shaphang shatei mihngi.
4. Ka Wah Umngot na shaphang shathie mihngi.
Ki Khyndai Umdih Khyndai Umtong ki long-tang ki kyntien kynnoh, ym ba ki mih 18 (Khadphra) tylli ki tynlong umdih tynlong umtong. Kumta ki tynlong jong ki Khyndai Umdih Khyndai Umtong ba la khot la ‘tang naduh ki sngi barim jong ka LIR kaba dei ka kmie jong u SHULONG ki long kumne harum: –
Sl. No. Kyrteng ki
Khyndai Umdih Khyndai Umtong North – Latitude bad East – Longtude

1. Um – Shyllong 25° – 31’ – 54.3” North & 91° – 51’ – 1.7” East
2. Um – Jasai 25° – 32’ – 20.9” North & 91° – 50’ – 55.8” East
3. Um – Rynthong 25° – 32’ – 52.9” North & 91° – 53’ – 8.5” East
4. Um – Dienglieng 25° – 32’ – 46.7” North & 91° – 53’ – 31.2” East
5. Um – Demthring 25° – 32’ – 47.1” North & 91° – 53’ – 53.1” East
6. Umkhen 25° – 31’ – 44.5” North & 91° – 53’ – 49.5” East
7. Umngot 25° – 31’ – 31.8” North & 91° – 53’ – 49.8” East
8. Umiew 25° – 30’ – 43.3” North & 91° – 50’ – 56.9” East
9. Umtongsyiem – Umjlieng 25° – 31’ – 44.2” North & 91° – 51 – 28.9” East

Kitei ki khyndai Umdih Khyndai Umtong ki mih ki tuid bad ki iaid lynti um kumne harum:-

1. Ka Um – Shyllong: – Ka mih na shatei lam sepngi jong u lum-knia jong u Lyngdoh Mylliem, u Lyngskor ka Raid Mylliem ha khlieh jong u lum uba ar jong u Lum Shyllong. Kane ka tuid shaphang shatei sha Umdiengpun ter ter sha Elephant’s Fall. Kumta kan jyn da la bha ba ia ka Elephant’s Fall yn ai kyrteng thymmai ne tap lubri noh da ka kyrteng Khasi kata ka Kshaid Um- Shyllong ne Um Shyllong’s Fall ha ka jaka ka Elephant’s Fall ba la ai kyrteng da ki nongwei. Nalor kane, la don sa kiwei ki kshaid kiba khot ka kshaid ‘Wei Iaplam bad ka kshaid Wir Phnang de kiba leit iakynduh ha ka sdad Umshun. Kane ka don sha ki thain Nongpyiur bad ka leit poi sha ka wah Ro-ro. Kane ka iaid lynti haduh kumba 6 lane 8 Kilometre bad ka tuid sha ka wah Umiam-Khwan hadien ba ka iashem bad ka wah Ro-ro.
2. Ka Um – Jasai: – Ka Um-jasai ka mih na ka Umpait-maw ba la sam umdih mynta sha ki thain Upper Shillong. Ka tynlong Umjasai ka sdang na kjat ka Iingsah pyngngad hyndai jong u Lat ne Governor jong ka Assam haduh ka snem 1947 ha kaba ia kane ka iing jong u Lat la ai kyrteng ha ka kyntien French ka “CHATEAU”. La ker ha baroh ar liang jong kane ka Wah da ki “Law diengmet suda ne Oak trees jong ka “Law Sorkari. Kane ka Umjasai ka tuid sha ka Wah Umshyrpi bad ka sa poi sha Wah Umiam-Khwan.
3. Ka Um – Rynthong: – Kane ka umpohliew ka mih na kjat u Lum Sohmyllan, Laitkor bad ka sa tuid na ki “Law- diengkseh jong ka “Law Sorkari (Laitkor Reserve Forest). Kane ka um ne wahduid ka tuid hapdeng ka shnong Malki bad Lumparing. Ka pyniasoh ialade sha ka Wah Umshyrpi bad ka sa poi sha Wah Umiam-Khwan ha Umiam Lake. Ha ki sngi barim, ka khlaw ka dang rben kum u tyrkhang nar bad ki “Tiew pathai khubor (Heloborous Nigar) ba mih shylluid bad phuh itynnad ha u bnai Nohprah bad ki shu saw hain hi hem man ka snem.
4. Ka Um – Dienglieng: – Kane ka tynlong um ka mih na kjat u Lum Sohmyllan (Laitkor Peak) na ka “Law Sorkari Laitkor Reserve Forest. Ka tuid sha kjat lum hapdeng ka shnong Risa Colony bad ka Cleve Colony ka sa poi sha ka “Nan Hordell” mynnor. Mynta ki khot ia ka, ka Fish Dale jong ka Meghalaya Fisheries. Ynda la poi haneng Shillong Law College, ka sa iasoh bad ka Wah Kdait kaba mih hapdeng ka Khlieh Shnong Malki bad ka Tripura Castle. Te, sa tip ia ka, kum ka Wah Umshyrpi bad ka sa tuid narud ka Madan Umshyrpi ha Malki. Kane ka Wah Umshyrpi ka don ar tylli ki kshaid, kawei na kita ka dei ka Kshaid “Wei-Lynnow harum jong ka dam-um Umshyrpi hapdeng ka Nongkseh bad Mawprem.Ki Phareng ki jer kyrteng ia katei ka Kshaid kum ka Gunner’s Fall. Kawei pat ka dei ka Kshaid Umshyrpi ne Bishop’s Fall kaba jrong kumba 400 feet ka kynjang.
   Ka jingiaid lynti ka Wah Umshyrpi naduh ba ka sdang haduh ba kut ka Wah Ro-Ro bad ka iashem lang bad ka Wah Umkhrah ha trai riat Sunapani. Kane ka Wah ka sa leit tuid sha ka Wah Umiam-Khwan. Ka jingjrong kane ka Wah ka long kumba 7.2 Kms. U President banyngkong ka India, u Dr.Rajendra Prasad uba la synran ia u da ka Mahadei ne First Lady jong ka ri india u la wan jngoh na khlieh lum jong ka Sunapani Power House (Forebay) ba ioh um-ding electric na ka wah-Umkhrah, kawei na ki Saw Basan jong u Lei Shyllong. Katei ka jingwan jngoh jong u ha Lum Kshaid Mawprem ka dei ha u October 1956. Ka Shillong ka la sam ding Electric ha ka sor baroh kawei naduh ka snem 1922. Ka long ka Power House kaba lai ha ka jingrim bad jingslem ha ka ri India baroh kawei.
5. Ka Um – Demthring: – Kane ka tynlong um jong ka, ka mih na kjat u Lum Sohmyllan ba don ha ka ‘Law Sorkari Laitkor Reserve Forest. Ki ju sin kyrteng ia kane ka um ba mih na u ‘Lum Sohmyllan ba ki Sim Thring hyndai ki bun bha. Kine ki wan her sngewbha bad ki rwai sngewtynnad ha khlaw bad ki dem ha kato ka thain. Ynda ka la poi shajan jong ka shnong Umpling ha shiliang wah bad ka Madan Rumnong, ka don kawei ka thwei kaba jylliew. Shisien kawei ka ‘Thei-lud na Umpling kaba kyrteng Ka ‘Liar, ka leit saitjain bad ka ur da pyllup bad ka hap ha katei ka wah. Te, naduh kata ka por ba ka ur katei ka briew ha katei ka thwei ki sa ai kyrteng noh ia kane ka thain da ka ‘Ur-Ka-Liar ne Spread Eagle Fall. Ka long kaba bakla lada yn khot kumba khot mynta, hana ka ‘Um-ka-Liar. Nangta la tip ia ka kum ka Wah Umkhrah, haba ka leit tuid sha ka Wah Ro-ro shuwa ba kan leit iasoh bad ka Wah Umiam-Khwan.
   Shuwa ban poi ha ka Wah Ro-ro, ka don kawei ka Kshaid kaba jrong kumba 300 feet kaba ryngkoh sha thwei. Ia kane ka kshaid la tip kum ka Kshaid Sunapani ne Beadon’s Fall. Hyndai uwei u Lieutenant Governor jong ka Bengal, uba kyrteng u Sir Cecil Beadon uba long u Lat khynnah jong ka Bengal ha ka snem 1857-64 u la wan jngoh teng ia katei ka Kshaid. Kumta la pynsah nam pynban ia katei ka kshaid ha ka kyrteng jong u, kata Beadon’s Fall. Hato ym la dei mo ka por ban pynkylla kyrteng noh ia katei ka Kshaid da ka kyrteng thymmai, kata ka Kshaid Wah Umkhrah ne Umkhrah’s Fall. Kane ka Wah Umkhrah ka iaid lynti ha ka jingjrong kumba 10.2 Kms.
6. Ka Umkhen: – Ka tynlong jong ka Wah Umkhen ka sdang na ka Um – Wiehkhlieh kaba don ka Pump House mynta jong ka P.H.E. Meghalaya. Ka tynlong um jong ka, ka mih na ka shnong Laitkor, Kynton-u-Mon. Ka leit tuid shaphang shatei lam mihngi bad ka poi sha Madanrting thain Happy Valley. La khot kyrteng ia kane ka Wah Umkhen ha Mawshbuit da ka Kshaid ‘Wei Tdem lane ka Sweet’s Falls. La ai kyrteng ia ka da u Rabindranath Tagore, uba la ioh ia ka khusnam Nobel Prize ha ka Literature na Norway ha ka snem 1913. Une u la wan jngoh ia katei ka kshaid ha ka snem 1927. Nangne kane ka Umkhen ka tuid pat sha Thangshalai By-Pass ter ter bad ka pyniakhlad ruh ia ka shnong Khyndew Soo, Hima Khyrim (Ri-Bhoi District) bad ka shnong Bam- Kamar, West Jaintia Hills District. Nangta ka sa tuid ha syndah jong ka Block II jong ka West Karbi Anglong District, Assam.
7. Ka Umngot: – Ka tynlong um jong ka Wah Umngot ka mih na ka tynlong um, kaba ki khot ka “Um dih” jong ka shnong Umphyrnai, Kynton-u-Mon jong ka Hima Khyrim. Ka sa poi sha ka Ur-Masi-u-Joh, Lamlyer bad ka tuid shaphang mihngi shathie. Kane ka wah ka phiah ruh ia u pud hapdeng Hima Khyrim bad ka Hima Sutnga hyndai ne West Jaintia Hills mynta. Kane ka Wah Umngot ka tuid sha ki riat ki ram, ka thom naphang lin. Kumta ka poi nyngkong sha ri dkhar, haba ka iakob bad ka Wah Umiew hyndai. Ynda ka la poi sha ri dkhar Sylhet, ka la shem ba ka Wah Umiew ka la sah shadien bad kam shym jop. Kumta ka la iaid suki noh jai hin hin, shu khyrwain bad kyrwiang ha ka dur jong ka Wah Rupa-Tylli mynnor.
8. Ka Umiew: – Kane ka tynlong um ka mih na Umthlieng na Rangkyndur jong ka shnong Rangbih-bih. Kane ka wah ka sa poi sha Nongkrem, Smit, Mawmuthoh, Wahtyngngai Raid Nongkynrih. Ka ia kynduh pat hadien sa bad ka Wah Umtyngar kaba mih hapdeng ka Elaka Laitlyngkot bad Laitkroh shuwa ban iasoh bad ka Wah Umiew. Nangta ynda ka la poi sha Shella pat la tip pat ia ka kum ka Wah Shella bad ka sa poi sha ri thor Sylhet (mynta Bangladesh). Dei hangne ba ka Wah Umiew ka jah syndon jar kum ka Wah- sah-jit. Kane ka wah ka shu duh shu dam noh sha poh-ktieh namar ha Khangdam Rupa ka Umiew, ka la rem noh da ka jinglehrain ha ka Wah Umngot hyndai.
9. Ka Umtongsyiem-Umjlieng – Kane ka wah ka mih na Rngi Shyllong. La tip ia ka kum ka Wah Pasir, Um-ja-ut, Khongwai-um, Kynrong-umkseh bad ka tuid sha Mawsawa. Ynda ka la poi ha Mawkaduh sharum, la khot ia ka, ka Wah Umjlieng. U Mawbynna jong u SHULONG, u khun khlem kpa jong ka LIR u don u ieng kynthuit haduh mynta ha ka shnong Mawkaduh. U don kham pajih na ka iew Mylliem rim. Kham sharum na utei u Mawbynna jong u Shulong la tip noh da ka Wah Umtongsyiem hadien pat naduh na madan Nongbiat (Nongbet), Madan Syngkhlieh la tip pat da ka kyrteng wah Umjlieng haduh ynda iakynduh bad ka wah Umiew ha shnong Bisi. Kane ka long kawei na ki shnong ba ka Syiem Pahsyntiew ka ju shong ju sah nyngkong ha Bisi.
   Ha ki sngi ba la leit noh ha Ri Khasi Sepngi naduh ka Hima Maharam na ka shnong Marshyllong, ki ju wan mane blei ki khun ki hajar jong ka Hima Maharam sha kliar u Lum Shyllong barabor. Kumjuh ruh ki War Shella ki ju sien burom ha ka nam u ‘Lei Shyllong da kaba ong ‘Khot Shyllong’ lada don kano kano ka jingjia ba don ki jingma kiba ap.
   Kumjuh ruh na Ri Pnar ki ju wan ban mane Blei sha u kliar Lum Shyllong khah khah. Ki Shangpung lei-lei ki ju knia da u masi sngaid uba heh bad nep reng ha kliar jong u Lum knia Lum Shyllong. Ki ju bam ia ka doh masi jong u, da kaba ngeit ban eh ka rngiew ka rwiang haba ki ainguh ha U Blei Shyllong da u masi. Hadien ba kim lah shuh ban wan bunsien namar ba ka jngai palat, uwei u rangbah uba kyrteng U Iakot Sungoh, u la shim bad rah shi troh ka khyndew na u Lum Shyllong. U la song ia ka ha ka jain sala lieh. Nangta u la leit kyntang ia ka leh niam ‘Lei Shyllong ha la ka shnong Shangpung, kaba ki ju leh niam man ka snem haduh mynta. La ju leh ia kane ka niam tang da ka jait Sungoh. Kane ka long kat kum ka jingiathuh u Babu Heibormi Sungoh. Kumjuh ruh ki Raliang ki la leh ia kane ka niam ainguh ia u ‘Lei Shyllong kaba ki ong ka leh niam ‘Poh Shyllong’ da ki jait Lamare jong ki Raliang.
   Kumta, ngi ngeit ba ki Khyndai Umdih ki Khyndai Umtong jong u Lum Shyllong, ki la rah shajrong ia ka nam ieid khlaw, ieid mariang ki Barim-Bajah. Haba la wai ka Dorbar “All India Speaker’s Conference ha Shillong, u Speaker jong ka Dorbar Parliament ka Lok Sabha u Mr.G.S.Dhillon; u la leit kiew bad iuh kjat nyngkong ia u lum Shillong shuwa ba un leit phai noh sha New Delhi ha u snem 1974, ha kaba la leit synran lang ia u, da u Speaker ba nyngkong ka Meghalaya u Prof. Radhon Sing Lyngdoh sha u kliar Lum Shyllong.
   Shisien phai ka khmat sha utei u Lum kyntang u Lum Shyllong jong ka ri, ngi tip bad ngi ngeit ba don u Blei u nong pynlong ia u. U Blei Shyllong u shu long junom kumba u ju long. Kumta ngin iai kynmaw ieid ia u Blei Shyllong da ka mynsiem ba sngewsarong la ka jong. U shu long hi kumba u ju long u jong ki Khyndai Umdih Khyndai Umtong ba ki kup ki phong ha ka mariang. Ngi shem ba mynta ki sngi barim u Hynniewtrep ki la sdang ban khie lung bad khie im biang. Kumta ki sngi jong ka ieng rangbah u briew bad ka ap jutang u Blei ki la sdang.
   N.B.: (Sngewnguh bad sah pyrto ia ki saw ngut na ka Raid Mylliem, Hima Mylliem kiba la ai jingtip ba myntoi shaphang ki Khyndai Umdih Khyndai Umtong jong u Lum Shyllong. Ka kyrteng jongki ka long: – (1).Rangbah Phriek Sing Sohtun (86 snem) na Umlympung, 12-Mer Mylliem; (2) Rangbah Slanshon Marbaniang na Lyngkien shyiap; (3) Kong Dromon Kharmawphlang na Lyngkien Shyiap (4) Kong Dhanakiri Marbaniang na Pomlakrai, bad (5) Rangbah B. Dkhar Rangbah Shnong Nongpyiur jong ka Raid Nongpyiur mynnor ba la jah noh na ka Hima Mylliem la slem bah).