“Ki khun Samla ka Balang ki dei ban tyngkan”

Shillong,12 Nailar:
“Ki khun Samla ka Balang ki dei ban kham tyngkan, kim dei ban khohreh than ban mareh sha ki kotkhubor haba don kano kano ka jingbym ia sngew thuh kaba dang sah hapoh ka jingpynbeit ka Balang” ong u Pastor NS Phawa, halor ka jingmih ki ar ngut ki samla u bah Kitboklang Nongphlang bad u bah Rickey Cooper ban kren sha ki kotkhubor halor ka jingkynnoh pyr shah ia u MS bad AO ka Dr.H Gordon Robert Hospital.
“Ka jingmih ha ki kot khubor ka la pynlyng ngoh ia ngi, namar ba katei ka kam ka dei kaba ka Assembly kam pat lah ban pynbeit, kane ka dei ka kam Balang. Haba don ki paralok ne ki khun samla ka balang kiba iohi bym don ka jingiaid beit ki don ka hok ban pyni, hynrei kam dei pat ban khohreh sha ki kotkhubor” ong biang u Pastor Phawa ha ka jingiakren bad ki nongthohkhubor mynta ka sngi ha kamra treikam jong u.
“Ngi pdiang ia ki jingai jingmut kiba lah ban kyntiew shaphrang ia ki kam, hynrei haba ka balang kam pat dep ban pynbeit ne ban peit bniah, ki dei ban kham tyngkan ym ban ia sted than sha ki kotkhubor” bynrap biang u Pastor ia ka jingkren ki ar ngut ki samla sha ki kotkhubor ha kine ki ar sngi ba la dep halor ka jingkynnoh pyrsha ia u MS ka Robert Hospital.
U Pastor Phawa u la pynkynmaw ba ka Balang Presbyterian ka la don ka kyndon lane ka ain kaba la pynmih ha u snem 1991, kaba la ong ba ki khun samla ka balang kim dei ban rah shabar ia ka kam balang katba ka balang ka dang shim ia ka jingiapynbeit. “Ngi la pynmih ka kyndon ha u snem 1991 kaba la ong ba ki khun samla ka balang kim dei ban rah shabar ia ki kam ka balang kaba dang sah ha ka jingiapynbeit” ong biang u Pastor Phawa u bym shym la treh ban ong eiei aiu ka balang kan leh ia kitei ki ar ngut ki samla kiba la pynkhein ia katei ka ain jong ka balang Presbyterian.
Shuh shuh u Pastor Phawa u la kyntu ia ki paidbah ba kim dei ban tieng ne ban sngew salia ban wan shah sumar ha Robert Hospital namar ba ki mih kiba kum kitei ki jingkynnoh, hynrei u la ong ba katei ka kynrum kynram kaba mih kan ym ktah eiei ia ka jingtreikam ka hospital ban sumar briew.