Ki Khasi, Garo ha Langpih, ki kwah ban hap sha u pud ka Meghalaya

Shillong:Ka Regional Commitee jong ka West Khasi hills district, kan sa ai jingmut ia ka sorkar jylla, ia kaba donkam ban kyrpad ia ka Sorkar Assam, ban buh ia kito ki shnong, kiba ki nongshong shnong ki dei na ki jaitbynriew Khasi bad Garo ha ki thaiñ Langpih dei ban pynngat sha Meghalaya.

Haba iathuh ia kane u myntri sorkar jylla, uba long ruh ha ka juh ka por, u shongknor jong ka komiti, bah Renikton Lyngdoh Tongkhar, u la ong, ba yn sa buh ia ka Tarik, ha ka taiew ban wan, na ka bynta ban leit jngoh ia kitei ki jaka.
Hadien, ka jing leit jngoh, kan don sa kawei pat ka jing ialang bad ki briew ba iadei bynta lang bad yn phah ruh ia ka jing pynskhem ba donkam sha ka sorkar jylla, ha kaba iadei bad ki shnong kiba hap ha ki thaiñ Langpih.

Haba kylli la ka thaiñ Langpih, kan kham jynjar, namar ka jing ia khleh jaitbynriew kum ki Nepalee bad Khasi, U bah Tongkhar u la ong “Dei na kane ka daw ba ngi la pynkhreh ban leit jngoh, khnang ba ngin tip bad ngin ia kren ruh bad ka sorkar Assam ba kan pynhap ia kito ki shnong Khasi ba ker sawdong da ki Nepali hi kin hap beit sha Meghalaya, ngin pyrshang ban leh ia kane”.

Ha kawei pat ka bynta, ka mon jong ki paidbah, ka dei kaba donkam bha ban pynkut noh ia ka mat kajia pud, ba la slem bha ha kane ka jaka.
U myntri u kyrmen skhem ba ki nong shong shnong jong ka thaiñ, kin don beit tang kawei ka sur ba kin don bad kano ka jylla, hynrei lada ki kynhun ki kwah sha Meghalaya, kiwei sha Assam; kane kan shem jingeh bha haba ia dei bad kane ka mat.
Katkum ka jingmut jong u hi, ka long ba ka mon jong u paidbah, kan dei beit ha ka por ba ka jing leit jngoh lang jong ki artylli ki komiti jong ka sorkar jylla ne ki Regional Komiti sha kito ki jaka.