Ki karkhana kin sa babe, lada kim pynkiew bai kit mar, ong ka JAC

Shillong: Ka Joint Action Committee (JAC) kaba kynthup ia ki Jaintia Hills Truck Owener Assiociation (JHTOA) ka Jaintia Hills Clinkers & Cement Assiociation (JHCCA) bad ka Meghalaya Truckers Union (MTU) mynta ka sngi, ki la wan ban ia kynduh ia u Myntri Rangbah ka jylla u Conrad K Sangma, halor ka jingsngap kuman jong ki Karkhana pynmih dewbilat ban pyntrei kam ia ka dor ba thymmai ba la buh da ka Sorkar jylla.

Haba ia kren bad ki lad pathai khubor na ka liang jong u Chairman ka JAC u bah Nehemaia Tyngkan, u la ong ba ka jingiakhih pyrshah ia kine ki Karkhana pynmih dewbilat kaba la sdang naduh ka 7 tarik u Naiwieng 2020, kaba dang bteng haduh mynta ka sngi bad kane kan dang bteng haduh ba kine ki karkhana pynmih dewbilat kin sngap ia ka jingbthah jong ka Sorkar ha kaba ia dei bad ka dor thymmai. U la iathuh ba ia kane ka jingsngap kuman jong kine ki karkhana pynmih dewbilat na ka liang jong u Myntri Rangbah u la ong ba halor kane ka mat ki Karkhana bad ka JAC ki dei ban pynbeit noh mardor.

Halor kane, lashai ka sngi kan sa don ka jingialang hapdeng u Deputy Commissioner bad ki nongpyniaid jong kine ki karkhana pynmih dewbilat, hadien kata kin sa tip ia ka rai jong ki ne ki karkhana dewbilat, u la ong.

U la ong ruh ba wat la na ka liang jong ka Sorkar jylla ka la dep ban pynmih ia ka dor thymmai ha kaba ia dei ban kit ia ka dewbilat, hynrei kine ki karkhana haduh mynta ki shu sngap kuman bad kim treh ban kohnguh ia kane ka jing bthah jong ka Sorkar, u la ong.

Ki la ong ruh ba na ka liang jong ka JAC ka kyrpad ia ki paidbah ba kin long kiba iaid shah bad ban snoh kti lang ha kane ka jingiakhih jong ka JAC namar ba ha kylleng ki jaka la don ka jingduna ka jingpynpoi ia ka dewbilat. U la ong ruh ba lada kine ki karkhana pynmih dewbilat, ki dang kuman na ka liang jong ka JAC, kan sa shim da kawei pat ka lynti ban ïakhih tyngeh shuh shuh, pyrshah ia kine ki karkhana pynmih dewbilat. U la ong ruh ba ha ki karkhana pynmih dewbilat ki bun ki jingpyntrei beain bad lada kine ki karkhana pynmih dewbilat kim leh ia kaba ki dawa na ka liang jong ka JAC, kan sa peit ia kaei kaba kin leh bad kine ki karkhana ruh kin sa babe.

U la iathuh ruh ba na ka liang jong ka Sorkar jylla ka la pynthymmai ia ka dor da kaba ka la buh ia ka dor T.7 tyngka, hynrei na ka liang jong kine ki karkhana ki dang ai hi ia ka dor kaba long T.4 tyngka.