Shillong:U MLA ka Congress u Bah Process T Sawkmie u la ong ba bun na ki kam pynroi, kiba ka jylla ka ioh mynta ki dei ki ba la sdang ban pyntrei da ka sorkar Congress mynba ka dang don ha ka bor bad mynta na ka liang ka sorkar Meghalaya Democratic Alliance (MDA) ka ioh ia ka jingmyntoi baroh.
Haba ia kren bad ki lad pathai khubor, na ka liang u bah Process u la ong ba ki kam pynroi ha ka jylla, la ka dei ha ka roi ka par ha ka jylla lane ka jingsdang ban pyrshang ban pynbeit ia u pud u sam hapdeng ka jylla Assam bad Meghalaya ka dei ka ba la sdang da ka sorkar ba la dep (Congress) hynrei mynta ka sorkar MDA ka ioh ia ka jingmyntoi baroh na ka jingtrei shitom ka sorkar Congress.
Ia kane u la ong haba jubab ia ki jingkynnoh ba na ka liang ka sorkar barim (Congress) kam shym la lah ban pynbeit ia u pud u sam ha ka jylla.
U bah PT Sawkmie u la ong ba ka sorkar MDA kaba la ialam da ka ka party NPP, kam dei ban klet ia ki sien jam kiba ka sorkar ba la dep ka la leh bad ia kaba mynta hi ka sorkar MDA ka ioh lut ia ki jingmyntoi na ka jingtrei shitom ka sorkar ba la dep.
U Bah Sawkmie, u la ong ba ha ki por ba ka dep ha ka por ba ka Congress ka dang don ha ka bor ban ialeh ban pynbeit ia u pud u sam hapdeng ka jylla Asaam bad Meghalaya, na ka liang ki bor synshar ki ju leit ban jurip ia ki jaka khappud, hynrei ka dei tang ka jingbym don ka jingshim khia na baroh ar liang, kane ka mat ka la shu sah kut kumto.
U bah Sawkmie, haba kren halor ka jingiakynduh jong ki myntri rangbah jong ki ar jylla ka ba long mynta ka sngi,u la ong ba ka lah ban don kano kano ka rai ka ba kine ki myntri rangbah ki lah ban shim mynta ka sngi, hynrei kane ka rai ki dei ban shim kat kum ka jingtip kaba bniah ia ka jinglong jingman bad ki dei ruh ban bishar bniah ia ka jingai jingmut jong ki briew ba don bynta lang shuwa ban shim kano kano ka rai.
U bah Sawkmie u la bynrap ruh ba ka rai ba kin shim mynta ka sngi ka dei ban long kaba lah ban pdiang da ki ar jylla ha ka ba kan ym ktah ia ka jingsngew jong ki nongshong shnong ha ki ar jylla (Assam lane Meghalaya).
U bah Process u la ong ruh ba man ka por ka ju don ka jingtam ia u pud na ka liang ka jylla Assam, ha kaba na ka liang ka jylla Meghalaya kam pat ju tam shisien ruh.
Lah ban kdew hangne ba mynta ka sngi ka 12 tarik ka don ka jingialang jong ki Myntri ranngbah ka jylla Assam bad Meghalaya ha Guwahati ha ryngkat ka jingiadon lang u Symbud Myntri rangbah ka jylla U Prestone Tynsong, u bah Lahkmen Rymbui u Myntri kam pohing bad ki Deputy Commissioner na ka jylla Assam bad Meghalaya.
Kane ka jingialang ka dei ka sien kaba saw hapdeng ki Myntri rangbah jong ki ar jylla ban pyniaid shakhmat ia ka jingpynbeit u pud u sam hapdeng ka jylla Assam bad Meghalaya.
Phi don ban ong eiei?