Ki kam jong U Narendra Modi, ki briew, ki la iohi; ong ki nongialam ba iasoh BJP na Mawsynram

Shillong:Da ki spah ngut ki nongkyrshan bad ki nongkitkam ba radbah jong u bah HM Shangpliang, MLA jong ka Mawsynram constituency, ki la wan ha ka ophis jong ka BJP ha Shillong, khnang ban pyniasoh noh haka party jong ka Bharatiya Janata Party (BJP).

Ia kane ka jingpyniasoh jong ki nongkitkam, ka dei mynhynnin ka sngi, ka 9 tarik nailar 2022, ha ka ophis treikam jong ka BJP. Ha kane ka sngi la ia poi lut ki nongkitkam, kynthup naduh ki longkpa ki longkmie, ki samla kynthei bad shynrang.

U MLA ka Mawsynram konstitwensi u bah HM Shangpliang la ioh khubor ba un sa rung noh sha ka seng BJP, ban iakhun ia ka elekshon jong u snem ban wan kata ha u snem 2023.
Ia kine ki spah ngut ki nongkyrshan ba radbah jong u bah Himalaya Shangpliang, la pdiang burom da u bah AL Hek, ba dei ruh u MLA na Pynthorumkhrah konstitwensi bad u National Executive Members jong ka BJP bad ka jingiadon ryngkat ruh u Vice President u Dipankar Chakraborty bad kiwei kiwei.

Ha kane ka sngi ia ki nongkyrshan baroh la ialam da u bah Rody Shangpliang, uba bat ruh kum u Vice President jong ka TMC na konstitwensi ha Mawsynram.
U bah Rody Shangpliang, uba dei u nongialam jong ka kynhun na Mawsynram konstitwensi ula pynpaw ba naduh mynta ka sngi, baroh ki nongkyrshan u bah HM Shangpliang, kin trei bor bah, ban pynkhlain ia ka party hapoh ka konstitwensi.

Ha ka jingiakren bad ki lad pathai khubor, u bah Rody, ula ong ba ka daw ba pynlong ia ki, ba kin shim ia kane ka sienjam, kalong ba ha kine ki 8 snem ba la iaid ka roi ka par khamtam ha kaba iadei bad ki nongrep, ki skhim bapher bapher kiba kane ka party ka la leh.
U la ong shuh shuh ruh ba ka daw kaba pynlong ban jied ia ka BJP ym ia ka TMC, ka dei namar ka TMC ha ka konstitwensi ka jongki kam pat lah ban suhthied, hynrei ia ka kam jong u Narendra Modi ki briew ki la dep iohi bad ia ka TMC ki briew kim pat iohi, na kata ka daw ki sa jied noh ban rung sha ka seng BJP, la ong u vice President.