Ki kali ki muid pat ki iaid laitlan, ki kali kit masi, ki shah khang sbak ha Umsning

Nongpoh: Ka kynhun ki Nongotdoh, kiba don ha lama Butcher Association of Meghalaya ha ryngkat ki nongialam jong kawei na ki seng Ri Bhoi Welfare Organization (RBWO), ki la pynpaw ia ka jingpyrshah kaba jur eh ia ki Doktor ka Veterinary ha Ri Bhoi, kata ka la jia hadien ba kawei ka kali kit masi, ba wan thied na Umsning da ka jingthmu ban pyndonkam tang ban ot doh masi ha Iew.

Katei ka jingjia shah bat ia katei ka kali kit masi, ka la jia hynnin ka sngi ha Umsning, ha kaba kitei ki Nongotdoh ki la kynnoh ba ki Doctor na ka tnad Veterinary, ki la bat ia kawei ka kali kit Masi bad hadien kata pat, ki la rah sha ia katei ka kali kit masi sha Police Outpost ha Umsning da ka jingthmu ban register case. Ki nongialam jong katei ka kynhun ki Nongotdoh, lyngba u Bah Esron Marwein, President ka Butcher Association of Meghalaya bad u samla P. Jones Kurbah, General Secretary ka RBWO, ki la pynrem jur halor kane ka jingleh kitei ki Doktor mrad, namar ka kam mushlia jong ki ia kitei ki masi ba thied na jaka lajong.

Haba iadei bad katei ka jingshah bat jong katei ka kali kaba kit ia ki masi shnong, kitei ki nongialam, ki la kren sha kitei ki briew na ka tnat Veterinary ki la buh jingkylli ba balei ki shu peit khmat tang ia ki kali kit masi bad kiba kit tang ia ki masi shnong ha ka jylla, pynban ia kito ki kali kiba kit ia ki muid na kiwei ki jylla, ki ioh beit ban iaid laitlan khlem da shah pynthut haei haei ruh.