Ki juh ki briew mynta kim shaniah shuh ha u Blei; pynban ha ka kyiad

Shillong: Ki arngut ki Pastor U Rev Shanlang Warjri bad U Rev AI Kharshiing, ki la thoh mynta ka sngi sha U Conrad Sangma, myntri rangbah ka Jylla, ha kaba ki pynpaw ia ka jing sngew bynniaw jongki, halor ka jing pynpoi kyiad sha ki iing.

Ka shithi, ka ong kumne harum –

Sahep badon burom,
Katkum katei ka phang ba la kdew haneng, ngi kyndit kumba iuh tdong bsein ban tip ba ka sorkar Meghalaya Democratic Alliance (MDA) lyngba ka rai ka kynhun myntri sorkar kaba plie ia ka jingkhangbah ban pynpoi kyiad ha ki iing.

Ha ka 7 tarik Nailar 2020, u nongaiktien ka Sorkar u la pynbna ia ka rai ka Kynhun Myntri ha kiba bun ki mat, hynrei ka rai ban pynpoi kyiad ha ki iing ka la bat khak ia ka jingmut jingpyrkhat.

Ngi dang kynmaw kyndiang ba ha ka khyllipmat shuwa ban pynbam smai myntri baroh phi iadem khrup ha ka jingduwai da ka jingngeit, hynrei kita kijuh ki briew mynta kim shaniah shuh ha u Blei; pynban ha ka kyiad ban kyntiew ia ka ioh ka kot ka jylla. Hato kane kam dei ka jingpynhiar dor ia ka tipbriew tipblei da kaba shah ban pynpoi kyiad sha ki iing. Ia ka mynsiem jong ka jingriewblei bashisha la patar lyngkhot lyngkhai da phi, kiba shong ha ki jaka ba halor ha ka dorbar.

Kijuh ki nongialam kiba la iaroh da kiba bun ki riewpaw khmat ka ri India ban ialam nakhmat ia ka jingduwai na ka bynta ka khlam jingpang Corona (ne Covid-19) ha ka 12 tarik Iaiong 2020, ki dei kijuh ki briew kiba pynlong ia ka kyiad ban pynkiew ia ka ioh ka kot; khnang ban bujli ia ka jingshalan beain ia u dewiong. Kum ka jylla, ngi riewspah ha ka spah mariang, hynrei ka jingpynpoh kyrdan ia ka tipbriew tipblei da ki nongialam, la khynniat ia ka jylla sha ka jingkyrduh khait. Ban iada na ka lehrain ka kyrduh khait, phi iohi ba ka kyiad ka dei tang ma ka ka tyllong ban kyntiew ia ka ioh ka kot. Ym lah ban len, phi iohi ba ki nongdih kyiad ki kyntiew ia ka ioh ka kot, hynrei ka jingshisha ki nongshong shnong ki kylla long ki mraw ka sorkar.

Haba ki nongshong shnong ki kylla long ki mraw ka sorkar, ka bymhok ka pyniap shiliang ia ka hok. Haba iap shiliang ka hok, ka jingduk ka dei ka jingkit bakhia jong ka jylla. Ka jingpynlong ia ka kyiad kum ka marbam bakongsan ha ka jylla kam iarap ia kiba duk, hynrei kan kyntiew ia kiba riewspah sha ka kyrdan balyngkar. Ka long kaei kaei kaba pynpar niangkhriat ban tip ba ka Sorkar ka peit sha ka kyiad ban lait im, hynrei ka nongrim kaba shisha ka jingkiew ka ioh ka kot ka dei haba ki briew ki ri khop ia ka jingim tipbriew tipblei. Sa kawei pat ka jingma kaba ap ia ka jylla ka long ba ka jingpynpoi hi sha ki iing ia ka kyiad ka dei ka lynti bah bajaijai na ka bynta kiwei pat ki jingdih ba pynbuaid. Kum ki nongshong shnong ka jylla, ngi pynrem da kdew kti ia ka kynhun myntri Sorkar namar ka rai ban pynsuk ban ioh kyiad.

Ngi kyntu da ka jingkitkhlieh ia ki nongialam ka jylla ban pyrkhat biang ha kaba bniah halor kane ka rai. Ha ka jaka ban mynjur rai bymman ban pynpoi kyiad sha ki iing, ka Sorkar ka lah dei ban pynleit jingmut ha ka rep ka riang bad kiwei ban kyntiew ia ka ioh ka kot. Wat ai ba ka rukom pyrkhat bymman kan pynjot ia ka tipbriew tipblei jong ki riewlum. Balei ba ka Sorkar ka khmih ia kiei kiei ki bymkhuid ba kynja doh ban pynkhlain ia ka pla tyngka? Ka dei ka jingai jingmut jong ngi ia phi ban iakhun ia ka jingmut jingpyrkhat bymman ba arsap ha ka por ka khlam jingpang Corona (ne Covid-19) ym da lade, hynrei da kaba pynurlong ia kaei kaba u Blei u kwah ia ngi ban leh (pule Micah 6:8).

Khublei shibun,
Rev Shanlang Warjri & Rev A. I Kharshiing