“Ki Jingpyndait”

AIS Suja

Ki Jingpyndait: ki jingpyndait ki don 7 tylli. Ha kano ka por bad ka bynta la pyndonkam ia ki? kata ka shong katkum na ka ktien u Blei. Jingpyndait ka mut khang noh ne pynkut noh ia kita ki por ki aiom ha kane ka pyrthei. Kine ki jingpyndait kin jia hapoh ka por ba u Blei u la buh, kata hapoh ka por jong “Ki shitaiew Bakhadduh ba la ong da u Daniel Nongiathuhlypa”. Daniel 9:27. Kane ka shitaiew la thew ia ki 7 snem, bad kine ki 7 snem ki don mar lai snem shiteng (3 ½ + 3 ½). Ha ka jingpyndait kaba Nyngkong: kan jia shwa ka jingiateh Jutang Jingiasuk (Middle East Peace Treaty) hapdeng ka Israel bad ki ri Muslim Middle East, da uta u briew jong ka pop (Man of sin) 2 Thessoloni 2:1-4. Ha ka Kitab jingpynpaw la ong kumne: Bad nga la khmih (ong u Ioannis) mynba uta u khun langbrot u la plie ia kawei na ki Hynniew ki Jingpyndait ……. Te nga la khmih kein, bad ha khmih ka KULAI BALIEH bad uta uba shong halor jong ka u don ka ryntieh bad, la ai ha u ka Pansngiat bad u la mih noh da kaba jop thiaw bad ia ka ban jop thiaw” Jingpynpaw 6:1-2.

Ka Kulai BALIEH, ka thew ia ka jingsuk ba shukor na ka daw ba uta u briew jong ka pop u mih bad pyniasuk ia ki Israel bad ki Arab Muslim na ka jingialehthma kaba la neh mynta da ki hajar snem khlem jingiasuk. U briew ka pop (Man of Sin) un ialeh ialade kum u briew ka jingsuk, “Un rung hapoh kata ka ri ba donburom (ri Israel) bad bun ki ri yn pynkyllon” Daniel 11:41. Ki Israel kin burom eh ia u, kin nang tharai u dei u Messiah jong ki, kumta kin iasoi ia ka soskular Jingpyniasuk (Peace Treaty) bad un ai ruh ai ki Israel ka hukum ba kin pynieng noh ia ka Temple Balai (Third Temple) ha Jerusalem.
Tang shu pynieng ia ka Temple ha Jerusalem, kan long ka DAK ba la sdang kane ka Shitaiew Bakhadduh ba la ong ha u Daniel 9:27. Ka jingpynieng ia ka Temple kaba Lai ha Jerusalem (Temple Mount) ka long ka dak ba shai kdar ba la sdang kata ka por ‘Shitaiew Bakhadduh ki por ba jynjar tam kaba dei “KA LYIUR” Mathaios 24:32.
Kane ka Jutang kaba ki Israel kin sa iateh (Peace Treaty) kan long ka Jutang ka Jingiap. “Te ka jutang jong phi (Israel) kaba bad ka Jingiap” Isaiah 28:18. Balei ka long kumta? To ngin ia peit
Namar tang shu lah iateh jutang hapdeng ka Israel, ka mut ba ki la iateh bad ka jingiap. Namar hadien kane ka KULAI BALIEH, kan wan ka Kulai ba SAW (red horse). Ka Jingpyndait kaba AR (Second Seal): “Bad mynba u la plie ia ka Jingpyndait kaba AR ……. La mih noh ka Kulai basaw, la ai bor ban shim noh ia ka jingsuk na ka khyndew khnang ba kin ioh pyniap noh paralok hi, la ai ha u ka waitlam ba khraw” Jingpynpaw 6:3-4.

Ka kulai basaw ka thew ia ka jingmynsaw ne ka thma ne ka jingiap. Mynta ngi iohi ba hadien ba la dep pynieng ia kata ka Temple ba lai, une u briew jong ka pop un shah ba ki Israel kin leh niam jingknia (sacrifices) hangta hapoh Temple, kata ruh kin ioh tang Lai snem shiteng (3 ½ snem) kaba nyngkong. Bad hamar pdeng ki lai snem shiteng kaba nyngkong bad ba ar, u briew ka pop un pynsangeh noh ia ki Israel ban leh niam hangta. U Daniel u ong kumne “Bad hamar kaba shiteng (3 ½ ) kata ka Taiew yn pynduh noh ia kata ka jingknia bad jingainguh bam” in the middle of the ‘seven, he will put an end to sacrifices and offering” Daniel 9:27.
Balei u pynsangeh kumta ia ka jingleh niam ki Jiw ne Israel? Namar u la khreh ialade ban shong ma u hapoh Temple, “Kat haduh ba u shong ha ka Temple u Blei, u da leh Blei ialade” he set himself up in God’s Temple, proclaiming himself to be God” 2 Thessoloni 2:4. Dei hapoh kane ka por kein ba u hukum ban pyniap ia ki Jiw ne Israel baroh kumba leh u Adolf Hitler mynshwa. Te dei ia kane ka bynta ba u Jisu u pynkynmaw da kaba ong – “Namar kata phin iohi ia kata ka jingijli ba pynduh ba la ong shaphang jong ka da u Daniel Nongiathuhlypa – ba ka da ieng ha ka jaka Bakhuid (Standing in the Holy place) ha Jerusalem” Mathaios 24:15.

Ka jingijli, ka thew ia une u Briew ka pop (man of sin). Bad ha kata ka por, ong ka Bible, “Ka kordit bah kan long ka bym pat ju long na myn dang long ka pyrthei” Mathaios 24:21. Dei ha kane ka por kein ba u u Blei un phah ha ki ia ka jingtrei ka jingbakla ba kin ngeit ia ka lamler, (ia ki Israel kein) 2 Thessoloni 2:8-12.
Ka jingpyndait kaba lai: Ka dei ka jingplie ia ka Kulai Baiong. “Te nga la khmih bad ha khmih ka kulai Baiong” Jingpynpaw 6:5-6. Kane ruh ka hap hapoh kata ka por jong ka shitaiew Bakhadduh ne ki 7 snem. Kane ka thew ia ka Nemsniew ia kaba u Jisu u la iathuh da kaba ong – “Bad kin long ki nemsniew, ki jingiap them ruh bad ki jingkhynniuh jumai ha shibun ki jaka” Mathaios 24:7. Kan long ka por ba u Blei u bitar ia u briew ka pop, u khun ka jingjot, u mrad khlaw kein.
Kumta haduh ka por jong ka shiteng Taiew kaba Nyngkong (3 ½), ki jingpyndait ba Nyngkong, ba Ar, bad ba Lai, ki jia. Bad ia kine ki lai tylli ki jingpyndait ka bible ka ong, ki long TANG KI JINGSDANG ba kordit bah. Hynrei ki jingjia ba shyrkhei tam kin jia hapoh ki Lai snem shiteng (3 ½) kaba Ar. Bad ia kine ki Lai snem shiteng kaba Ar la khot ruh ki 42 bnai ne 1260 sngi. Mathaios 24:15-21. Jingpynpaw 13:5, ka kren shaphang kita ki 42 bnai ne 1260 sngi.
Kumta ka jingpyndait kaba Lai, kaba long ka por jong ki nemsniew, ki briew ha sawdong pyrthei kin kordit da ka jingiap thngan namar yn ym don jingbam ei ei shuh ban bam, kat haduh ba ki kloi ban mane ia u ksuid u soitan.
Ka jingpyndait kaba Saw: K

a jingpyndait kaba saw (fourth seal) kan jia mar ia sdang ki 3 ½ snem kaba Ar, ne kita ki 42 bnai ne 1260 sngi. “Bad mynba u la plie ……. nga la khmih, bad ha khmih ka kulai balieh Bthuh (a pale colour horse), uba shong halor jong ka u dei U JINGIAP bad ka jaka shong riewiap (Death and Hades)……. Shi pawa kata ka khyndew yn pyniap da ka waitlam bad ka Nemsniew bad jingiap them da kita ki Mradkhlaw ka khyndew” Jingpynpaw 6:7-8. Dei ha kane ka por kan jia ia kaba u Jisu u la ong – “Kin ai ia phi ha ka shitom, kin pyniap noh ia phi …… jar uba iaineh haduh kaba kut (haduh ka jingiap) te un lait im” Mathaios 24:9-13.
Dei hapoh kane ka por ka Jingpyndait kaba saw ba ia kata ka Jutang Jingsuk (Peace Treaty) la pynkhein noh kumba la ong ha u Daniel – “Bad hamar shiteng kata ka Taiew yn pyn sangeh ia ka jingknia (stop the sacrifices). “Ka Jutang jong ki Israel bad ka jingiap yn pyndam noh” Isaiah 28:18. Dei ruh ha kane ka por ka jingpyndait kaba saw ba ia u soitan la pynhap sha kane ka pyrthei. Dei hapoh kane ka jingpyndait kaba saw kan don ka jingshah pyniap ki Israel 2/3 bynta. “Te kan jia ha ka ri baroh ong u Trai, Ar bynta kin (Israel) kin duh noh bad kin iap noh, shi bynta 1/3 yn pynsah” Sekharaiah 13:8. “Tang lai bynta ba dang pynsah yn ri pynim” Rome 9:27-29.

Dei ruh hapoh ka por ka jingpyndait kaba saw ba kin mih ki Arngut ki Nongiaphla, kin iathuhlyp 1260 sngi ne 42 bnai. Jingpynpaw 12:6-14. Tang shu pynhap ia u soitan hapoh kane ka por, “un rung hapoh kata ka ri ba donburom (Israel)” Daniel 11:41. Te ha shwa ia kane ka jynjar bah kan don ka jingmihpat bad ka jingrongnoh (resurrection and rapture). Kata ka mut ba ka jingmihpat bad jingrongnoh kan jia hapoh ka por jong ka jingpyndait kaba saw (fourth seal). Dei ruh hapoh kane ka jingpyndait ba saw ba uwei pat u Mradkhlaw un wan kiew na ka khyndew ba la pynbor ia kita kiba shong ha kata ka khyndew ba kin mane dem ia uta u Mradkhlaw, ia uba la pynkhiah na kata ka jingmong iap jong u. La ai ha u ba kata ka dur Mradkhlaw kan ioh kren ruh, kat ki bym mane ia kata ka dur u Mradkhlaw, yn pyniap ia ki …… ba yn buh ruh ia ka Dak ha ka kti ka Mon ne Shyllangmat jong ki ……. Bad ka Number uta u Mradkhlaw ka long 666″. Jingpynpaw 13:11-18. Ha kata ka por yn wan mih 3 ngut ki angel ba pyrta na suinbneng bad kin ong “To sheptieng ia u Blei, to ai ka burom ha u naba la wan ka por jingbishar jong u: To phin mane dem ia uta uba la thaw ia ka bneng ia ka khyndew ia ka duriaw ia ki pukri um” Jingpynpaw 14:6-7. U angel uba lai pat u ong “Lada uno uno u mane dem ia u Mradkhlaw bad ia ka dur jong u ……. Yn pynkordit ia u da ka ding bad da u kyndok” Jingpynpaw 14:9-11. Ka dei ruh hapoh kane ka por ba u soitan un ialeh thma bad ki Riewkhuid “Bad la ai bor ia u (ia u 666) ban ialeh thma bad ki riewkhuid bad ban pyniap ia ki” Jingpynpaw 13:7.
Hynrei kaei kaba la jia? “Hynrei ki la jop noh ma ki ia u, namar kata ka snam u khun langbrot bad namar ka ktien ka jingphla jong ki” Jingpynpaw 12:11. Kumta ngi iohi ba hapoh ka Jingpyndait kaba saw (fourth seal) ki don shibun ki jingjia.

Ka Jingpyndait kaba San: Tang shu plie ia ka jingpyndait kaba san, la iohi ia ka Duwan, hapoh ka Duwan don shibun ki mynsiem (spirits) jong kita kiba la iap na ka bynta ka ktien u Blei. Kine ki mynsiem (spirits) ki la pyrta ki la ong – “Tat lano ko Trai kynrad men bishar kut bad pynhiar kput na ka bynta ka snam jong ngi halor kita kiba shong ha kata ka khyndew (pyrthei). Hangta, la ai ha ki ki jainkup balieh bad ki da ia shongthait shipor tad ynda pyndep ka jingpyniap ia kiwei pat ki riewkhuid” Jingpynpaw 6:9-11. Kumta ka jingpyndait kaba san ka long ka por ka jingpyniap ia ki riewkhuid kiba dang don ha ka pyrthei ia kiba ym pat rong noh.
Ka Jingpyndait kaba Hynriew: Tang shu plie ia ka jingpyndait kaba Hynriew, kan don ka jingkhynniuh jumai bakhraw, ka sngi ka kylla iong kum ka jain shniuh ba khain, u bnai u kylla snam, ki khlur ki hap sha khyndew ……. Kiba khraw batri kiba riewspah, u mraw uba laitluid kin buhrieh ialade ha krem mawsiang, ki ong – “To hap ha ngi, to buhrieh ia ngi na ka khmat uta uba shong halor ka khet, bad na ka jingbitar u khun langbrot” Jingpynpaw 6:12-17. Dei ha kane ka por kein ong u Jisu – “Lymda pyndkut ia kita ki sngi, (Kino kita ki sngi? Ki 1260 sngi kein) te kan ym lait im kawei ruh ka doh. Hynrei na ka bynta kiba la jied (kino kita kiba la jied? ki 1,44,000 (shi lak sawphew saw hajar) ngut ki Israel, ia kiba la pynsah na ka kti u Mradkhlaw, ki Israel kein. Te na ka bynta kine ki Shi lak sawphew saw hajar, yn pyndkut noh ia kita ki sngi bakordit tam. Mathaios 24:22.
Hadien kine kiei kiei, Nga iohi u paidbah byllien bym lah niew shuh na ki kynja bynriew baroh ki da ieng ha khmat ka khet u khun langbrot (Jisu) kiba kup ki jainkup balieh, ki dieng tlai ha ki kti ……. U Tymmen basan u kylli – “Kiei kine kiba kup ki jainkup balieh? Ki long kiei? Nangno ki wan? Jingpynpaw 7:13. Kine ki long kita kein kiba wan na ka jingjynjar bakhraw kiba la sait ia ki jainkup jong ki ha ka snam u khun langbrot. Jingpynpaw 7:14-17.

Ka Jingpyndait kaba Hynniew: Ka long ka jingsngap jar shiteng kynta ha Bneng. Jingpynpaw 8:1. Balei ka sngapjar ka Bneng? namar ka jingkmen ka jingpyndon burom ia u Blei, ki da ong – “Ah Trai u Blei jong ngi ban pdiang ia kata ka burom bad jingpyndon burom bad ia ka bor – Namar Me la thaw ma Me ia kiei kiei baroh, bad namar ka Mon jong Me ki ia long bad ba la thaw ia ki” Jingpnpaw 4:8-11. Ka jingsngap jar ha Bneng haduh shiteng kynta ka dei ka dak jingburom jong ki angel ia ki briew namar la pynksan ia u briew da ka snam u Jisu Khrist. “Te khamtam shibun haba la pynksan ia ngi da ka snam jong u, yn pynim ia ngi da u na ka jingbitar u Blei” Rome 5:9. “Naba u Blei u la buh ia ngi ym ka jingbitar, hynrei ia ka ban ioh jingpynim da u Jisu Khrist u Trai jong ngi” 1 Thessoloni 5:9. Kumta kiba la siewspah da ka snam kin ym leit rung sha ka jingbitar jong u Blei. Ha kajuh ka por ba ka jingsngap jar ha bneng ka long ka dak ban plie noh ia ki 7 ki Turoi ka jingbitar u Blei ia ka pyrthei baroh kawei ban pynshitom ia kiba kyntait ia ka jingaiei u Blei da u khun jong u u Jisu Khrist. Jingpynpaw 8:2-5.
Kumta ki 7 ki Jingpyndait (Seventh Seals) ki don ka por bad ki jingjia kiba jia hapoh kata ka shitaiew Bakhadduh ba la ong da u Daniel. Kumta ka Kitab Jingpynpaw bad ka Kitab u Daniel ki don ka bynta bakhraw jong ki jingjia ki sngi khadduh (End Times), kaba iathuh sha ka pyrthei kat kiba ngeit, kat kiba pdiang, kin ioh tip. Amen.