“Ki jingpang basniew ka Ri Egypt”

AIS Suja

U Blei u kular mynshuwa ia ki khun Israel ia ki jingkyrkhu kiba mih na ka jing kohnguh lada kin kohnguh ia u Blei, u Trai u Blei un pynskhem ia ka Jutang ia kaba u la smai ha ki kpa tymmen jong ki u Blei un kyrkhu ia u soh ka kpoh ia u kew ia ka wain ia ki jingri kum ki masi ki langbrot, bad yn ym don shynrang ne kynthei ki ban lyngki hapdeng jong ki.

Nangta u Blei u ong shuh shuh “U Trai un shim na me ia ka jingkhrew baroh bad un ym buh halor jong me (Israel) ia kawei kein na kita ki jingpang ka Ri Egypt, jingpang basniew ka Ri Egypt ia kiba me tip: Hynrei un buh ia ki halor kita baroh kiba shun ia me” Deuteronomi 7:12-15.

Ki jingpang basniew ka Ri Egypt ki long kito ia kiba u Blei u la phah halor ka ri Egypt ha u Syiem Pharoah kum ka khlam ki puit khlam iap them kyrduh bam bad kiba kum kita. La pynjot ia ki dohkha ki mrad, ki um ki wah da ka snam ha baroh ka ri Egypt. Kaei kaba ngi tip ka long ba ki Israel kim kohnguh ia u Blei jong ki u Blei u Abraham u Isaak bad u Jakob. Kumta u Trai u la bitar eh namar kim sngewnguh ia u Blei uba la pyllait ia ki na ka jinglong mraw na ki kti u syiem Pharaoh, kumta u Blei u la phah ia ki jingsniew ha rukom ki jingeh jingpang ba sniew ka ri Egypt kumba u Blei u la kren.

Ka jingbym kohnguh bad sheptieng ia u Blei kam don kumta la jia ki jingsniew halor ki Israel hyndai, kat haduh ba lamih ka jingkylli na ki kynja bynriew – balei u Trai u la leh kumne ia kane ka ri bad ia kane ka iing? Te ki la jubab – Namar ba ki la lyndet ia u Trai u Blei ki kpa jong ki uba la wallam noh ia ki na ka ri Egypt, bad ki la bat ia kiwei pat ki blei ki la mane ia ki bad shakri ia ki: Namar kata kein u Blei u la wallam ia kane ka jingsniew halor jong ki Israel” 2 Khronikl 7:19-22.
Kaei kaba ka ktien u Blei ka don ban kren ha ngi mynta ha kane ka juk? Kane kajuh hi ka jingsniew, jingpang sniew viruses kum ka Corona Virus, HIV, bad kiwei ki jingpang kiba shyr khei ki wan mih tang na ka daw ba ki bynriew ha pyrthei kim sheptieng bad kim kohnguh shuh ia u Blei. Kane ka dei kata ka jingpang sniew ka ri Egypt kein ia kaba u Blei u la phah bad sympat ha kane ka juk namar ka por ka la dei eh ia u Blei un leh kumta. Lada ki briew ha kiba bun ki ri ka pyrthei kim kyndit bad khot ia ka kyrteng u Blei, yn dang wan shuh shuh kaba jynjar kthang kumba u Blei u la phah hyndai ha ri Egypt.
Ha kane ka juk jingstad bun bah ki briew kim don por ban ngeit ban kohnguh ne sheptieng ia u Blei. Baroh ki jingleh ki long tang ki jingsniew suda ha khmat jong u Blei, u Blei u la sngewsih palat ia u briew. Kumta u Blei u hap ban phah mynta ia ki jingpang sniew ka ri Egypt kein, tad ynda kata ka jingpang sniew ka la wan ban tap ia ki ri ka pyrthei mynta bun kin tip ba pleng u don u Blei u don u Khun u Blei uba bat ia kane ka bor (Control) ha ki kti jong u.U Blei u ieit palat ia ki briew baroh phar ha ka pyrthei kumta u pynkynmaw, u wan jngoh ia kane ka pyrthei da ki jingpang sniew da ki khlam ki jingiapthem ki nemsniew ki jingshlei um jingrang tyrkhong bad kiwei khnang ba ki briew kin ioh tip u don u Blei uba khraw uta u Blei jong u Abraham u Isaak bad u Jakob u bym ju kylla ia kaei kaba u la kren.
Kaba don kam tam ha ka ri bad ka jaid bynriew ka long mynta ban duwai ban wad ia ka khmat u Blei ba un pyllait ia ngi na kane ka jingpang sniew ka ri Egypt kaba la iaid sawdong ka pyrthei: bad wat hapoh ka ri India mynta. Na kata ka daw ym don por shuh phai sha u Blei ha jingduwai Namar u la kren shai da lade hi u ong – “Lada ki briew jong nga ia kiba la khot da ka kyrteng jong nga, kin pynrit ialade, kin duwai, bad kin wad ia ka khmat jong nga, kin phai na ki lynti bymman jong ki: Kumta te Ngan sngew na bneng, Ngan map ia ki pop jong ki, NGAN PYNKHIAH IA KA RI JONG KI” 2 Khronikl 7:14.