Ki jingkylli nonghikai kiba lait tuh, dei kiba phah shon ha Guwahati

Shillong: Ki jingkylli jong ki nonghikai kiba ia khun ia ka eksamin MTET dei kiba phah shon ha Guwahati. Haba jubab ia ka jingkylli jong u MLA ka Congress na Rajaballa u Dr.Azad Zaman, u myntri ka tnad pule puthi u bah Lahkmen Rymbui u la ong ba ka jingkylli na ka bynta ki nonghikai kiba ia khun ia ka eksamin MTET dei kaba phah shon ha Neicom Impression , East Bye Lane 18, R.G.B Road, Guwahati-781005, Assam. U myntri u la iathuh ba ia katei ka jingkylli la shimti da ka tnad pule puthi ban pynpoi sha ki Centre bapher ha ryngkat ki bor pahara kiba khlaiñ.
U la iathuh ba kitei ki dei ki jingkylli kiba la thaw da ki nonghikai na ka Directorate of Education Research & Training, District Institute of Education & Training, Colloege,Lecturers of Education & School Teachers. Haba jubab ia ka jingkylli ba la bynrap da kiwei pat ki MLA u bah Lahkmen Rymbui u la ong ba ka sorkar ka dang tohkit ia katei ka jinglait tuh ka jingkylli bad haduh mynta ki dang ap ia ka ripod ka ban mih na katei ka jingtohkit bad u la iathuh ruh ba la dep ban ujor FIR ia katei ka jingjia. Shuh shuh u la ong ba hadien ba la ih ka ripod ka sorkar kan leh ia kaba donkam. Katba u Saleng Sangma MLA ka NCP u la ong ba dei ban pynduh pyndam noh ia kato ka eksamin kaba la dep bad dei ban pynlong da kaba thymmai naba katei ka jinglait tuh ka pyni ba ym lah satia ban shaniah ba ka lait tang ha ri Lum Garo bad ka lah ruh ban lait ha kiwei pat ki jaka.