Dr. B.R. Marpna
U Blei Um ju iehnoh ia ngi haba ngi la nang ban wad bad ban sliang ia U. Ki don ki jingkular ba U Trai U kular ia ngi bad lada ngi wad ia ka khmat jong U. Ka jingthrang bad jingsliang ka dei kaba U Blei U kwah na ngi. U Jisu U ong, Suk kiba thrang bad kiba sliang ia ka hok, naba yn pyndap ia ki. Ka jingthrang bad ka jingsliang ka dei ruh ka jingaiti lut ban ioh ia kaei kaba ngi kwah ne angnud ha ka jingim jong ngi. “Hynrei lada nangta men da wad ia U Trai uba U Blei jong me, men sa shem ia u, lada men da wad ia u da la ka dohnud baroh bad da la ka mynsiem baroh” (Deuteronomi 4:29). Haba ngi la nang ban wad ia U, ka mut ba ngim shim kyntait ia U hynrei ngi pdiang bad ngeit ruh ha U. Katba ngi dang wad ia U, ngim ailad ia kata jingkyntait ba kan don ha ka jingim jong ngi namar ba ngi sngewthuh ba ngi donkam ia U. “U la leit mih noh ban tan ia u Asa, bad u la ong ha u, ko Asa, bad phi baroh ki Judah bad ki Benjamin, to sngew ia nga: U Trai u long ryngkat bad phi, katba phi long ryngkat bad u, bad lada phin wad la u, phin shem ia u; bynrei lada phin kyntait ia u, u ruh un kyntait ia phi” (2 Ki Khronikl 15:2)
Ka jingnang jong ngi ban wad ia U Blei, kan pynlong ia ngi ba ngin shaniah tylli mlon ha U bad khlem artatien bad ngi kyrmen ba U long ruh Uba kloi ban iohsngew ne shahshkor ia ki jingud jingnam jong ngi. “Te U Jehoahas u la kyrpad ia U Trai, bad U Trai u la shahshkor ia u; naba u la iohi ia ka jingbanbein ia ki Israel, kumno ba u syiem Syria u la banbein ia ki” (2 Ki Syiem 13:4). Haba ngi wad ia U Blei, ngin hap ban wan da ka dohnud kaba pynrit hakhmat jong U. Iehnoh ruh ia ki jingleh bymman bad phai sha U Trai. “Lada ki briew jong nga, ia kiba la khot da ka kyrteng jong nga, kin pynrit ia lade, bad kin duwai, bad kin wad ia ka khmat jong nga, bad kin phai noh na ki lynti bymman jong ki; kumta te ngan sngew na bneng, bad ngan map ia ki pop jong ki, bad ngan pynkhiah ia ka ri jong ki” (2 Khronikl 7:14)
Shuh shuh, ka jingkyrkhu kaba khraw ha ka jingim jong ngi kaba ngi mad, ka dei ruh haba ngi wan ban sngap aiu U don ban kren ia ngi lyngba ka Ktien jong U bad ka Ktien jong U Blei kan ai ia ngi ka jingim. Ka mynsiem jong ngi ruh kan im bad shem ia ka jingsuk kaba ngim lah ban batai. “Pyndem la ka shkor, to wan ruh ha nga; to sngew, te ka mynsiem jong phi kan sa im: bad ngan pynlong bad phi ka jutang bymjukut, ki jingisnei baskhem jong U Dabid kein” (Isaiah 55:3). Katba ngi dang wan hajan jong U Blei, ki don ki jingkular ha ka jingim jong ngi ka ban wanrah ka jingkdang ne sngewhun ha ka jingim. Ka ai ruh ka jingjahthait ba ngin ioh shong ha ka jaka kaba khuid, kaba long ka templ jong U Trai. “Suk uta u briew ia uba me jied, bad uba me pynjan ha me, ba un ioh shong ha ki phyllaw jong me: yn pynkdang ia ngi da ka jingbha ka iing jong me, ka jaka kaba khuid ka templ jong me” (Ki Salm 65:4)
Ngi don ruh ka jingsngewshlur bad jingshaniah lyngba ka jingngeit ha U, kaba long ka jingkular haba ngi wan hajan ia U Blei. “Ha uba ngi don ka jingshlur bad ka jingiohwan ha ka jingshaniah, da ka jingngeit jong ngi ha u” (Ephesos 3:12). Ka jingkular ba U Blei Un ai ia ngi haba ngi la nang ban wad ia U, ka dei ka por kaba ngi donkam eh ha ka jingim bad ban wad ia ka jingiarap na U. U David u ong ka jingiarap jong nga ka long na U Trai Uba thaw ia ka bneng bad ia ka pyrthei. “Namar kata te to ngin iawan hajan da ka jingshlur ha ka khet ka jingaiei, ba ngin ioh pdiang ka jingisynei, bad ba ngin ioh shem ka jingaiei ia kaban iarap ia ngi ha ka por ba donkam” (Hebru 4:16)
Khatduh eh haba ngi la nang ban wad ia U bad ban pan ia kiei kiei kiba dei biang katba kum ka mon jong U Blei, U long uba kloi ia ngi ban iarap bad ban sngew ruh bad ban ai ruh ia kita ki jingkwah ne ki jingangnud jong ngi. “Te kane ka long kata ka jingsngew shaniah kaba ngi don sha u ba, lada ngi pan ia kaei kaei ruh katba kum ka mon jong u, u sngew ia ngi” (1 Ioannis 5:14)
U Blei Un kyrkhu bad na ka bynta ka burom jong U, Amen.
Phi don ban ong eiei?