Shillong, 8 Naitung:
U President Rang bah ka seng HSPDP u bah Ardent M Basaiawmoit uba dei ruh u MLA jong ka Nongkrem u la ong ba ki jingkren u bah Adelbert Nongrum, MDC ka Jaiaw la sngew kumba lada u bah Ardent u ia kynduh bad u bah Paul Lyngdoh ha lynti kin shu ia kynrup noh.
Lah ban kdew ba ha ka jingiakren ha ki ar sngi ba la dep bad u bah Adelbert u la ong ba haba u don ha ka shuki CEM ha KHADC- ka thong jong u ka dei ban pyntylli ia ki lai tylli ki seng riewlum kata ka KHNAM, HSPDP bad UDP bad kaba ha khmat eh kaba u la buh ka dei ban pyniakhublei kti ia u bah Ardent bad u bah Paul. Halor kitei ki jingkren u bah Adelbert, u bah Ardent u la ong, “Katei ka jingkren u bah Adelbert la sngew kumba lada jia lada ma nga bad u Paul ngin ia kynduh ha lynti syngkien ngin shu ia shrut beit”.
Shuh shuh u bah Ardent u la pynpaw ka jingsngewlyngngoh ia ka jingkren u bah Adelbert bad u la ong ba ka dei ka jingkren ka bym shong nongrim haei haei ruh. “Ngam tip na kaei ka daw bad halor kaei ka nongrim ba u Bah Adelbert u kren ia kitei ki kyntien ba dei satang lada ia khublei kti ma nga bad u Bah Paul yn sa lah ban iatylli ki seng riewlum, bad ka jingkylli ka mih hato lada ngi la lah ban khublei kti ka jaidbynriew kan im?” u la ong.
U bah Ardent u la ong ba um ju buh daw bad um ju buh kput iano iano ruh bad ia kitei ki kyntien u la ong ba u la ju kren ha ki kotkhubor,ha ki jingialang paidbah ne ha la ki paralok parajor ba u dei u briew uba dang duna ha baroh liang, “Hynrei ngan pyrshang ban bat skhem ia ka nongrim kaba nga ieng,namar kata ka daw nga kiar na ka jingiabuh daw shimet lait noh haba ia tyngkhuh ha ki nongrim kata ka iaid la ka jong” ong u bah Ardent.
Lah ban pynkynmaw ba shuwa ban rung ha ka jylli jong ka saiñpyrthei u bah Ardent M Basaiawmoit u dei u nongialam sengbhalang na ka seng FKJGP katba u bah Paul Lyngdoh pat u dei u nongialam ka seng KSU. U bah Ardent u la pynkynmaw ba ha ki por ba u dang ia samla ki don ki daw kiba u ia tyngkhuh bad u bah Paul ha ki jingiatreikam hynrei u la ong pat ba ia kitei baroh ladep ban ia pynbeit.
Haba pynpaw ba kam don shuh ka jingiabuh nud hapdeng jong kitei ki ar ngut ki nongialam, u bah Ardent u la ong ba lah ban sakhi ia ka jingkitkhlieh jong ki ia ka jaitbynriew da kaba kyrshan iwei ia iwei ha ka jingiatai ha Ing Dorbar –Thaw-aiñ ka jylla. “Don ki jingkylli kiba nga wanrah ma nga u bah Paul u kyrshan bad don pat kiba wanrah u bah Paul nga ruh nga kyrshan, kane ka long ka jingiatylli na bynta ka jait bynriew” u la ong hynrei u la pynkut pat da kaba ong “Tang kawei nga ong ba ngam lah ban ia peiñ badno badno ruh ne ban pyndem hano hano ruh,lada dei ki paralok ba iajan ne kiba haing hasem ia ka nongrim kaba nga ieng”.
Phi don ban ong eiei?