U Nitin Gadkari, myntri ba peit ia ka tnat ka kit ka bah bad ka tnat pynbha surok, ula jubab hynnin ka sngi, ha Lok Sabbha, ba ka sorkar India, ka ai jingbit, tang ia kawei ka jingkieng thew ha Meghalaya bad katei ka dei ha ka surok bah NH 6, hynrei kiwei pat ki jingkieng, ki dei kiba la shu shna bad pyntrei kam beain.
Haba jubab ia ka jing kylli jong U Ma Vincent Pala, MP ka Shillong, U Gadkari, u iathuh ba ka jingkieng, kaba la mynjur da ka sorkar India, ka dei kaba don ha Jowai-Ratacherra.
Halor kane ka mat, U Ma Pala, u dawa ban pynlong da ka jing tohkit jong ka CBI, halor ki jingkieng thew be beain, ba la pyntrei kam beain, da ka tnat ka kit ka bah jong ka sorkar Jylla, ha ka surok bah NH 6, kaba la ktah shibun bah ia ka jing ioh kamai jong ka sorkar Jylla.
U Gadkari, u iathuh ba ka tnat ka kit ka bah jong ka sorkar jylla, ka la aiti ia kitei ki jingkieng sha ki riew shimet, ha ki 5 tylli ki jingkieng thew, wat la ka sorkar India, kam shym la ai jingbit satia ban plie ia kitei ki jaka thew.
U Gadkari, u ong shuh shuh ba ka jingplie ia kitei ki jingkieng thew ha surok bah, ka la pynjot ia bun bah ki surok ha ka NH-6 bad la iathuh ba la ju iakren ia kane ka kam bad u myntri ka tnat ka kit ka bah ka sorkar jylla, U Ma Sniawbhalang Dhar. “La iathuh ia ka sorkar jylla, halor ka jingjot jong ka surok bah, kaba la pynmih ia jing sahkut ki nala, ka jingsniew noh ki bynta jong ki surok, namar ka jingplie ia kitei ki jingkieng thew kali bad ki jaka pahara ha ka surok bah NH 6” ong U Gadkari.
Phi don ban ong eiei?