Shillong: Lai sngi lynter ki la mih ki jingjia kiba kyndit ha KHADC bad katei ka sdang naduh ka 10 tarik haduh myn hynin ka sngi. Ka 10 tarik ka dei ka sngi kaba u Lat u la phah ban lum ia ka dorbar ia tynjuh bor ha KHADC, hynrei shuwa ban sdang ka dorbar u CEM barim u bah Pynshngaiñ N Syiem u la risaiñ kum u CEM bad ka dorbar ka la kut khlem ioh ia pyni bor satia.
Kaba kham pynkyndit tyngeh ka dei ha ka 11 tarik ha kaba ka kong Grace Mary Kharpuri MDC ka Nongshken ka la thep kyrteng kum ka kyrtong CEM na ka kynhun jong ka PDA. Katei ka jingjia ka la pynkyndit shisha ia ki MDC ka KHDA kiba ia donlang bad ka kong Grace ha ka jingialang jied kyrtong CEM jong ki bad kiba ia bamja lang ha ka por mynsngi bad ka kong Grace katba mynstep pat ka la thep kyrteng ban ia khun pyrshah ia ki.
Kam shym la kut tang hangtei, hynrei ka la mih ruh ka jingpynkyndit myn hynnin ka sngi ha kaba baroh ki MDC ki la poi shriak sha District Council ban ia shim bynta ha ka elekshon jied CEM pynban haba ki poi hangtei ki ioh khubor ba u Chairman bah L.G Nongsiej u la risaiñ bad ym lah ban pynlong ia ka elekshon jied CEM khlem u nongpyniaid ia ka dorbar bad katei ka kam jied elekshon CEM kam shym la lah ban long mynta ka sngi.