Bah RM Shabong
Ka khlam corona, ka la nang sur sha kylleng ka pyrthei bad ka la nang sar ruh ia ka thain shatei lam mihngi, hynrei ka Jylla, ka donbok, ba u don tang uwei uba iap bad sa 12 ngut kiba ioh pang, kiba la jem lut khoit bad lait noh na kine kiba dang ioh pang thymmai ar ngut sha Garo Hills. Halor kane ka mat, ngi hap ban kynmaw, ba ki jing iakhih paidbah, ki la long la jan baroh shisnem jong u snem 2019, ba la pynlong da ki seng bapher bad ki mat kiba ha khmat duh jong ki jing iakhih, ki long (i) Inner Line Permit bad (ii) Citizenship Amendment Act (CAA) bad lah ban kynmaw, ba katei ka jing iakhih, ka la iaid da ka jing ia khang kali, ka jing ia talasi ia ki bar Jylla bad nangta, ka bud ruh sa ka jing ia kynad ha Ichamati, kaba la pyn shong syier ia ki bar Jylla, ha katei ka jaka, hadien ka jing iap jong uwei u nong ialam KSU na Sohra.
Lah ban ong namarkata, ba ki jingiakhih bapher, kiba la jia ha ki bynta jong ka Ri Khasi Jaintia, ki la pynpra ia ki ktem bapher jong ki bar Jylla, namar ba ki la don bun bah kiba la leit phai noh sha la ki jong ki shnong jongphi bad katei lehse, kan dei ruh ka lad jingiada kaba kongsan tam, kaba la weng noh, na kane ka khlam covid – 19, kaba la dei ban nang trei jur, lada don ka jing ia khleh bad ia rung ia mih ha ki bynta jong ka Ri Khasi. Kumba ka long mynta, la iohi ba ka jing iakhun pyrshah ia kane ka jingpang, ka don beit tang da ki trai shnong bad ki nongshong shnong ba pura jong ka Jylla bad ka suk ban ia wad ia ka leit ka wan, ka jingsdang bad ka jingiaid jong ki briew kiba don ia katei ka khlam, namar ba kim dei ki poiwir, lane kiba phet jaka nawei shawei.
Kam dei tang kata, hynrei da ka jingdon tang ki trai shnong suda, ka pynsuk shibun ruh ia ka sorkar Jylla, namar ba ka jing ialeh ban pynduh jait ia ka khlam, ka kham khraw bad ka kham jur na ki paidbah nong shong shnong, ha kaba haduh ha kine ki sngi, ki ia trei khlem bai sngi bad ki ia trei khlem kano kano ka jing khmih lynti bad katei ka dei ka dak, kaba paw haduh ha kine ki sngi, ba lah ban khanglad ia ka iaid ka ieng, ka leit ka wan bad ka jing pynkhein ain da ki nongshong shnong.
Katba ka jia, ngi hap ban shim namarkata, ba ki jing iakhih paidbah ha u snem 2019, ki la long ka lad, kaba pyn sting ha ka jing iakhun ia ka khlam coronavirus.
Phi don ban ong eiei?