Ki iing kiba bha bad ka ding ilektrik ba pura ha u 2022: President

New Delhi, 9 Jylliew:
Da kaba sngewkhia, halor ka jinghiar jur jong ka jingjyrwit jong ka sain hima sima ha ki khyndiat snem ba ladep, mynta ka sngi, U Pranab Mukherjee President jong ka Ri, u la kren shai ba ka sorkar kan trei tyngeh, na bynta ka roi ka par, ha kaba kan nym ailad ia ki kam bamsap.
“U paidlang ka India, ula jied ia ka jing ia tylli, ka jingkhlain bor bad ka India kaba thymmai bad ka sorkar jongnga,kan trei shitom, na ka bynta ban poi sha katei ka jingkhmih lynti jong ki 125klur ngut ki nongshong shnong ha ka Ri” ula ong shuh shuh.
Ha ka jingkren jong u, ha ka jingshong dorbar jong baroh ar tylli ki iing jong ka Parliament, ula kren shai ba ka sorkar kan shim ia kajuh ka bynta ia ki riew rit paid ruh, ba kin don bynta lang ha ka roi ka par jong ka India.
U President, u ong shuh shuh, ba ka jingpynbeit ia ka ioh ka kot jong ka ri, ka long kaba donkam eh. Ka sorkar kan thaw lad ban pynkiew ia ka ioh ka kot, kan khanglad ia ka jingkiewdor, kan thaw shibun ki lad ioh kam ioh jam bad kan pynioh ia ka jingshaniah, ha la ka jong ka ri bad shabar ruh kumjuh.
U President, ula kren shai, ba ka sorkar, kan pynleit jingmut bha ia ka kam khaii dewiong bad ban ailad ai ki riew shimet, ba kin shim bynta ha ka rukom kaba shai bha.
U President, ula kren shai, ba ka sorkar kan nym ailad satia ia ki kam leh niewbein ia ki kynthei bad ka ain, kan nang pynkhlain ha ka jingbishar ia katei kakam bad ula ong ruh ba ka sorkar, ka kut jingmut ban pyntreikam ia ka bhah, kaba 33 percent ia ki kynthei ha Parliament bad ha ki dorbar Jylla ruh bad ban ai jinghikai ruh ia ki khynnah kynthei, ha ka pule puthi.
U Mukherjee, ula pynsngew ba ka sorkar kan pynduh ia ka jingsngew iapher hapdeng u nongkyndong bad u nong sor, ha kaba ki don bun ki nongrep, kiba ju pyniap noh ialade. U ong ruh ba ka jingthmu jong ka sorkar, ka long ban pynduh syndon ia ka jingduk tasam ha ka Ri.
U President, ula pynthikna, ban ai ia ki iing shong kiba biang ia baroh ki nongshong shnong lem bad ka ding ilektrik, kaba baroh shisngi kynthih, ha shwa u snem 2022.