Nongpoh: Na ka bynta ban pynsuk ia ki nongtrei ka koit ka khiah, ki bor pyniaid District ka Ri Bhoi lem bad ka tnat Urban Affairs hapoh ka Distrik, ki la rai ban pynkylla ia ka Housing for Urban Poor, ki iing baduk kiba don hapoh ka shnong Umbuda ha Nongpoh, kum ka jaka sah ba shipor da ki briew kiba trei ha ka koit ka khiah.
Kitei ki iing baduk ka sorkar ha Umbuda, ki don kumba 44 tylli ki iing, ha kaba kane ka tnat ka dang thmu ban pyndep ruh sa katto katne ki iing hashwa ban aiti pat sha ka Nongpoh Town Committee ban jied ia ki longiing kiba donhok ban sah ha kitei ki iing.
Ka Kong RM Kurbah, DC Ri Bhoi, ka la iathuh ruh, ba ka nongrim kaba la pynlong ia ki Bor District ka Ri Bhoi, ban pynlong jaka sah ba shipor da ki briew ka koit ka khiah, ka dei halor ka nongrim, ba don napdeng ki doctor ne ki nurse kiba sumar ïa kito kiba pang COVID-19 kim don ia ki jaka sah ba biang ne ba kyrpang hynrei ki ia sahlang beit bad ki bahaiing hasem jong ki bad kane ka lah ban buh jingma shikatdei ia ki bahaiing jong ki nongtrei ka tnat ka koit ka khiah.
Watla kitei ki iing baduk dang don ki jingduna kiba hangne hangtai, hynrei ka DC ka la ong ba kan sa shimkhia ban pynbiang lut baroh ki jingdonkam, khnang ba kan iarap ia ki nongtrei ka koit ka khiah.
Phi don ban ong eiei?