Shillong: Ha ka jingialang kaba la long mynta ka sngi ha ïewduh , u Chief Executive Member ka KHADC u bah H.S Shylla u la thalaiñ tyngeh ia ki IAS ophisar ha kaba u la ong ba ki IAS ophisar ha kane ka jylla ki tip ia ka dor ka mur ki mar-rep tang ha ka kot sada hynrei kim tip pat jia aiu ha iew. “ Ki IAS ki tip ia ka dor ka mur jong ki mar-rep tang ha ki kot sada, kim ju tip ia ka jingeh ki nongrep, ki IAS ophisar ka Meghalaya ki dei ki bym ler kam, kim ju tip ia ka dor kaba shisha kumno u nongrep u im ha iew, kata ka de ka jingbiej jong ki IAS ophisar” ong u bah Shylla uba la iathuh ruh ba u la lap ia kane dalade hi ha ka por ba u long u myntri sorkar uba peit ia ka tnad ka rep ka riang.
U bah Shylla u la kynnoh ruh ba ia ka sorkar Meghalaya bunsien la thied da ki khar Kaia bad ka shong ha ka mon ki khar Kaia katba ki leh bad dei na kata ka daw ba ki nongrep ki shah khniot, “Ngam tip shuh mynta ka long kumno, hynrei bunsien ia ka sorkar ha Meghalaya la thied da ki khar Kaia, ha Meghalaya la ju synshar da ki nongkhaïi kiba heh, ki thied ki khar Kaia ia ka sorkar ruh” ong biang u bah Shylla.
Haba kren ia ka jingshah ot kilo ki nongrep ha ïewduh u bah Shylla u la ong “De iki Mahajon khyllah jait kiba shim kabu ia ki nongrep, ki hikai lai phew jait ki kam buit tuh, u khasi u kamai ia ka hok haba khia 2 kilo u ot 2 kilo hi, haba don para Khasi ka iew ruh ka hok, u nongrep u leh hok, u nongthied ruh u leh hok hynrei kine ki nongkhaii ba nabar ki don da ka buit thok shirynieng na khlieh ha kjat” u la ong.
Shuh shuh u bah Shylla u la ong “Ka Iewduh ka dei ka iew u kup shilliang u sem shilliang, ka Iewduh ka de ika Secretariat jong u nongrep nad de iu nongrep u bah buh dor ia ki nongkhaii ym ban buh dor ki nongkhaii ia ki nongrep. Na kata ka daw nga ong ba dei ban don ka kudam sorkar ka ban buh da ka dor pynap ba haba ym long ka dor ha iew dei ban die ha ka kudam sorkar bad ha katei ka kudan lada iap ruh ka bai trai ka mih hynrei ka jingbym don kata ka polisi ka la pyniap ia u nongrep, nga lei nga ju pynshlur ia u nongrep ba haba ym long ka iew, ka iap ka rep ka riang bam ei ka ram jong ka bank ruh” u la ong biang.
Kumba ka long mynta u bah Shylla u la ong ba shisien ba la poi ha Iew Mawlong ki nongrep ki long kum kito ki dohkha kiba la ngat ha ruh bad kim lait khih shuh ki hap ban ai kat ka dor kaba ki nongkhaii ki pan bad kane ka de inamarba kam don ka kudam sorkar. “Ka Iewduh ka de ka Iew u khasi khara, ngi ai por ia ki bym dei Khasi ba kin nangmih noh namar kane ka dei ka Secretariat jong u nongrep”, ong u bah H.S Shylla.