“Ki hynriew ki jingpyndait”

AIS Suja

Ki Hynriew ki jingpyndait (Seven Seals) kim pat jia. Don bun kiba batai ba ki Hynriew ki Jingpyndait ki la sdang lane ngi la poi ha kata ka Jingpyndait. Hynrei to sngewthuh bad to tip ba ki jingpyndait kim pat sdang wat kawei ruh. Kine ki Hynriew Jingpyndait (Seven Seals) kin sdang mar ia sdang mih ka hukum ba ki Israel kin ioh ban pynieng pat ia ka Temple ka Ba Lai (Third Temple).

Mar ia mih ka hukum ban pynieng Temple, kan sdang shwa ka jingpyndait kaba Nyngkong, bad kan wan mih ka kulai Balieh bad uba shong halor u Kulai Balieh u bat ia ka ryntieh bad u deng ia ka pansngiat. Kane ka thew ia ka jingsuk ba shukor bad kaba shipor. Kaba Ar ka jingpyndait ka dei ka kulai Basaw, ha uta uba shong halor jong ka, la ai bor ban shim noh ia ka jingsuk na ka khyndew. Kaba mut ba kan don ka thma kaba khraw. Ka Jingpyndait kaba Lai, ka jingwan mih ka Kulai Baiong, kane ka thew ia ka Nemsniew ba jur eh. Kine ki Lai tylli ki jingpyndait (Three Seals) kin wan jia hapoh kita ki Lai snem shiteng jong ki Hynniew snem jong ka shi taiew kaba khadduh, ba la ong ha u Daniel 9:27. Bad kine ki Lai tylli ki jingpyndait ki long ka por ka jingsdang jong ki jingjynjar bakhraw. Jingpynpaw 6:1-6.

Kumta tang shu pyndep ia ka jingpyndait kaba Lai, kan wan ka jingpyndait kaba saw (fourth seals), bad kan wan mih ka kulai Balieh bthuh uba shong halor jong ka u kyrteng u Jingiap (Death). Une u Jingiap la ai bor ia u ban pyniap da ka waitlam, da ka nemsniew, da ka jingiap them bad da ki mrad khlaw ka khyndew. Jingpynpaw 6:7-8. Nangta kan wan ka jingpyndait kaba san kan paw ka Duwan bad ka mynsiem jong kita kiba iap na ka bynta ka ktien u Blei ba ki da phong ia ki jainkup balieh bad ba ki dang iashong thait shwa shipor. Jingpynpaw 6:9-11.

Hadien kane kan wan mih ka jingpyndait kaba Hynriew, bad kan jia ka jingkhih jumai ba jur, ka sngi kan kylla long kum ka jain shniuh bakhain, u bnai un kylla snam, ki khlur kin hap sha khyndew, ia ka bneng la pynkynran noh kum ka kitab kaba kli, u lum bad ki dewlynnong kin kynriah noh. ki Syiem ka khyndew bad ki Bakhraw Batri, ki rangbah shihajar, kiba riewspah, kiba khlain, u mraw bad uba laitluid kin ia buhrieh ialade ha ki krem bad hapdeng ki mawsiang jong ki lum bah. Kin ia ong ha ki lum, to hap ha ngi to buhrieh ia ngi na ki khmat uta uba shong halor ka khet, bad na ka jingbitar u Khun langbrot (U Jisu). Jingpynpaw 6:9-17. Ha kane ka por ka jingiap ka la phet kam don shuh watla ki briew ki kwah eh ban iap. Ka long ka por ba jynjar tam, ka bym pat ju long na myndang long kane ka pyrthei. Mathaios 24:21.

Hadien kane, kan wan mih ka jingpyndait kaba Hynniew (Seventh Seals). Ka dei kaba khadduh. Tang shuh plied ia ka jingpyndait ba Hynniew, ka don ka jingsngap jar ha Bneng shiteng kynta. Ki don ki 7 ki angel bad 7 ki Turoi. Kine ki 7 ki Turoi ki dei ki 7 ki Jingbitar jong u Blei ia kane ka pyrthei. Jingpynpaw 8:1-13. Ka long ka por kaba itriem ia ka jingbitar u Blei.

Naduh ka jingpyndait kaba saw haduh kaba Hynniew, ki long kita ki por ba la ong ki 42 bnai lane ki 1260 sngi, lane ki Lai snem shiteng kaba Ar jong ki 7 snem. Ka long ka por ba u soitan Lucifer u synshar ia kane ka pyrthei na ka Temple kaba Lai na Jerusalem halor Temple Mount, u da leh Blei ialade. 2 Thessoloni 2:1-4.
Ki Jiw, bad ka pyrthei (World) ki ap khmih dngong ia ka por ba ki Israel kin ioh hukum noh ban pynieng ia kata ka Temple kaba Lai (Third Temple) ha Jerusalem “KA IA KA LA JAN” Jingpynpaw 1:3