Ki Hynniew shnong Raid Tynring, ki la duh lut ia ki kam pynroi, dei naba pynkylla kyrteng U Syiem Khyrim

Shillong: “Ki Hynniew Shnong kiba kynthup ia ka Lumkseh, Mawkynring, Mawkduk, Wahmyntait, Lumdiengnga, Lumrit bad ka Kyrdeng ka ba hap ha ka Shnat Raid Tynring ki la duh lut ia ki kam pynroi kiba wan na ka liang ka sorkar ha kaba kam don kyrteng ha ka list jong ka bill 2018 jong ka KHADC” la ong da u Asst Rangbah shnong ka Mawkynring u bah Orkybest Nongkhlaw.
Ia kane u Bah Orkybest Nongkhlaw u la pynpaw ha ki nongpathai khubor da ka ba ong “Kine baroh ki long hadien ba u Syiem u la pynkylla kyrteng ia ka Raid Tynring sha ka Shnat Raid Tynring ha kaba la don haduh 6 Raid kmie bad 34 Raid ki barit jong ka Hima Khyrim ha kaba ka Shnat Raid Tynring kim don ha ka list jong ka KHADC, namar ka Shnat Raid tynring ka dei kaba la pynmih hi da u syiem.”
U bah Orkybest Nongkhlaw u la bynrap da ka ba ong “Ngi ki Hynniew Shnong ngim ju ioh ia ki kam pynroi na ka liang ka Sorkar bad ruh kim ju bit ban wan rah ia kano kano ka kam pynroi khlem da ioh ia ka NOC na ka liang u Sordar ka Raid Tynring.”
Ka Dorbar Pyllun jong ki Hynniew shnong ki la pynpaw ia ka jingsngew khia ia ka jing leh donbor u Syiem ka Raid Tynring u Balajied Sing Syiem, ha kaba u la thung hi ia u sordar u C Aikom Diengdoh, khlem da tip ki paid ka Raid.