Shillong: U bah Prestone Tynsong, symbud myntri rangbah ka jylla, u iathuh ba ka sorkar jylla mynta ka sngi, ka la shim ia ka rai ban ym shah ban shim ia ki bai sah jong ki khynnah pule ki ba sah ha ki Hostel ba pyniaid da ki riew shimet naduh u bnai Iaiong haduh da la pynmih da kawei pat ka jingpynbna.
Haba iakren bad ki lad pathai khubor na ka liang u bah Prestone u la iathuh ba ki trai jong ki Hostel ba la pyniaid da ki riew shimet, ki lah ban shim ia ka bai sah jong ki khynnah pule tang ia kito ki ba sah ha ki Hostel ha kane ka por ba don ka jingpakhang shnong,hynrei ia kito ki ba khlem sah kim dei ban shim ia ka bai sah.
Ha kaba iadei ba ka rai jong ka sorkar ia ka jingsiew ia ka bai skul ha ki skul ba ioh jing iarap na ka sorkar bad ki skul kiba pyniaid da ki riew shimet bad ki balang, ka sorkar jylla ka la pdiang ia ka jingpynbna lynba ka tnad pule puthi.
Ha kaba ka sorkar jylla ka la rai ba ki skul kiba pyniaid da ka sorkar bad ki skul ki ba ioh jingiarap na ka sorkar ki dei ban shim ia ka bai skul 50% na ka bynta 3 bnai bad ki skul kiba pyniaid da ki riew shimet bad ki balang ki dei ban shim tang ia ka bai skul (tuition fee) lait nah kiwei kiwei ki jingsiew.
Kaba mut ka bai admission/annual fees ym donkam ban siew? Ne kiei kita kiwei pat ki jingsiew lait noh ka bai Tution fees.