Ki hospital bad ki ICU, ki la sdang khapngiah, ong ka DC “Dei ban deng mask, ha la ki ing, na bynta 14 sngi kynthih”

Shillong:Ka khubor, ba la pynmih da ka Deputy Commissioner, East Khasi hills, ka iathuh ba ki stad ka koit ka khiah, ki ai jingkhein, ba ka jingdon shisha ki nongpang, ha ka jylla, ka lah ban tam, haduh palat 25 shah, na kaba la ioh jingkhein. La iathuh ba kito kiba bun, kiba ioh ia katei ka jingpang, ki dei ki bym paw satia shabar bad ki don ruh ki bym shym la leit ban phah test ialade bad kine kiba kit buhrieh ia ka jingpang, ki pyn ia bit ia kiwei ruh, ha la ki iing ki sem, ne ha shnong ha thaw.

Naduh ka 1tarik Jymmang 2021, ka don ka jingkiew stet jong katei ka jingpang bad kiba iap ruh kumjuh ha East Khasi hills district, ha kaba ki don 2,098 ngut kiba iap bad 59ngut kiba iap, tang ha ki 11 sngi bad kane ka pyni ba ki don 191ngut kiba pang bad sa 5ngut kiba iap ha ka shisngi. La ong shuh shuh ba ki hospital, ki la sdang khapngiah ha kine ki sngi bad ki kamra ICU ruh kumjuh. La ong ruh ba kito kiba iap, ki dei kiba don ha ki rta kiba hapdeng 20 haduh 50 snem bad kiba kham rangbah, ki dei kiba la pang khrew bad nangta sa kitei kiba kham khynnah, kim dei satia kiba la ju pang mynshwa.
Halor kine ki jing shisha, la ong namarkata, ba baroh ki paidbah, ki dei ban shim, ba ki dei kiba don jingpang, tangba kim bym paw dak satia shabar bad ki dei ban bud ia ki kyndon bad kitei ki kynthup, ha kaba deng mask, ha la ki jong ki iing, naduh mynta bad haduh 14 sngi kynthih.
Dei ban shong beit, ha la ki jong ki iing bad ym ban ia rung ia mih na kawei ka iing sha kawei pat, wat hapdeng kiba ia shong marjan. Ki dukan die marbam, ki lah ban plie, tangba tang uwei na kawei ka longiing, u lah ban leit thied marbam bad ym dei ban ia shong slem.

La ong shuh shuh, ba ha ka taiew ba ladep, ki don 50 percent, kiba ioh pang, kiba dei ki high risk contact bad kitei ki dei kiba ha iing, ki para ba ia treilang, ki para marjan bad kiba ia ithuh bad kito kiba la ioh pang corona virus.
La ong namarkata, ba kito kiba ioh jyrhoh, khieshoh, ki dei ban shong kyrpang ialade, lada jia ba kim leit ban phah test ruh. La ai jingmut namarkata, ba dei ban ia shong jngai, ban da sait kti bad ym dei ban ktah ia la ki khmat, ki khmut bad shyntur bad dei ban deng mask, ha ki jaka paidbah.