Ki heh spah, ki la nang sieb, da ka tyngka, ther ka Congress ia ka BJP ha Assam

Guwahati:U Gaurav Gogoi, MP jong ka Lok Sabbha, mynta ka sngi, ula ther tyngeh ia ka sorkar jong ka BJP ha ka Jylla Assam, ha kaba ula ong ba ha kane ka sorkar, ki dei tang kiba heh spah, kiba nang sieb da ka tyngka suda.
U Gogoi, uba dei ruh u nong ialam khynnah jong ka seng Congress ha Lok Sabbha, haba kren ha ka jing ialang paidbah ha North Lakhimpur, ha kaba ki la wan shim bynta ki nongialam bapher jong ka seng Congress.

“Ka don tang kawei ka jing kylla, ha kaba ka sorkar BJP, ka wan rah ha ka jylla, bad kata ka dei ba ki briew jongki, ki kamai spah shi katdei, da kaba ki plie ia ki hotel, ki dukan kiba heh ba heh ha Guwahati” ong U Gogoi.

“U myntri rangbahduh, u hikai ia ki samla khlem kam, ba kin die pakawri, ba kin ioh kamai jakpoh ialade, kumta la u khun jong U Amit Shah, u dei pakawri ne em?” kylli U Gogoi.

U Gogoi, u ong shuh shuh ba ka seng Congress, kan wan phai biang ban thaw sorkar ha ka Jylla, ha ka elekshon, ka ban sa wan.

U Ripun Bora, uba dei U President jong ka Assam Pradesh Congress Committee,u la kynnoh, ba kane ka sorkar BJP ha Assam, ka don ar ngut ki myntri rangbah bad kitei ki long U Sarbananda Sonowal, uba la da jied da ki MLA, nangta sa U Himanta Biswa Sarma, uba shu leh myntri rangbah hi ialade.