Ki heh HNYF ha Ri Kanaan, mih sa ka Womens’ Wing

Nongpoh: Ban nangpyniar ia ki shnat treikam ka Seng, ki nongialam ka Hynniewtrep National Youth Front (HNYF) Sengkmie, hynnin ka sngi ki la ioh ban pynskhem ia ki nongkitkam ka HNYF, Women’s Wing, ia kaba la wan ban pynskhem hapoh ka Ri Kanaan Hall kaba don ha shnong Umeit, Ri Bhoi District.

Ia kitei ki nongialam ka HNYF, Women’s Wing, la wan ban pynskhem da u Bah Sadon K. Blah, General Secretary, ha kaba u la pdiang sngewbha ia kitei ki Longkmie, namar ka jinglong kloi jong ki ban long kum ki dkhot hapoh ka HNYF bad kata ka long na ka bynta ban bah ban kit ia ka lyngkor ba khia jong ka jaidbynriew.

Ha katei ka sngi, ha shwa ban pynskhem ia kitei ki nongkitkam ka Women’s Wing, u Bah Sadon K. Blah, u la pynshai ia ki mat treikam jong ka seng, ha kaba u la ong ba ka seng hi ka ieng ban ialeh, na ka bynta ban iada ia ka jaidbynriew bad katno tam lei ha kaba kum kane ka por, ba ka jaid bynriew, ka la jan shah rah ha ka Umsaw, kata na ka jingwan tyllep ki briew kiba nabar ka jylla.

Utei u nongialam ka HNYF, u la ong ba ka seng ka ieng halor ka nongrim ban iada ia u pud u sam jong ka Bri u Hynniewtrep, namar kumba ka jingshah kyntur hapoh ka jylla ka la nangjur nangjur katba nangmih ki sngi ki por, ha kaba u la kdew ruh ba ka jylla ka la shah kyntur pud ym tang na ka jylla Assam, hynrei ki la don ki thain hapoh ka bri u Hynniewtrep kiba la shah kyntur pud wat ha ka ri kaba marjan kata ka Bangladesh. Kiba la donlang ha katei ka sngi kaba la pynskhem ïa ki nongkitkam ka HNYF, Women’s Wing, kiba kynthup ia u Bah Skan Rani, Vice President ka HNYF, Sengkmie, u Bah Marcus Marten, President ka HNYF ha Ri Bhoi, u Bah Edilbert Nongrum, General Secretary ka HNYF ha Ri Bhoi lem bad kiwei de ki nongkitkam ba hakhmat ka HNYF Sengkmie.

Ki nongialam ba nyngkong eh jong ka Seng HNYF Women’s Wing, ki kynthup ia ka President ba la jied ia ka Kong Beti Jyrwa, Vice President, Kong Orianda Kharkongngor, General Secretary, Phrinsibon Kharmuti, Treasurer, Wansuk Lyngdoh bad kynthup kiwei kiwei ki nongialam lane ki dkot executive ka HNYF Women’s Wing.